Lidhje

Kalendari Historik, 15 maj - 2003-05-19


Më 15 maj të vitit 1972, guvernatori i shtetit të Alabamës, Xhorxh Uollis, u qëllua dhe u plagos rëndë, ndërkohë që po zhvillonte fushatë në shtetin Marilend, si kandidat për president i Shteteve të Bashkuara.

Guvernatori Uollis u plagos, ndërsa po i jepte dorën njerëzve në turmë para së cilës, minuta më parë, ai kishte mbajtur një fjalim. Për koinçidencë, tema e fjalimit të tij lidhej me krimin dhe atë që ai e pati quajtur si mungesë respekti në rritje për shtetin juridik.

”Dërgoini politikanëve një mesazh për shtetin ligjor. 127 policë janë vrarë në Shtetet e Bashkuara gjatë vitit të kaluar dhe më shumë u vranë sivjet...”, tha zoti Uollis.

Xhorxh Uollis tha se ekzistonte një komplot për të vrarë policët në Shtetet e Bashkuara. Atentatori, i cili mund të kishte qenë edhe vrasësi i tij, Arthur Bremer, u arrestua, gjykua dhe u shpall fajtor për vrasje në tentative.

Ai vazhdon të jetë edhe sot në burg. Xhorxh Uollis u paralizua përgjithmonë nga mesi e poshtë. Ai shërbeu katër mandate si guvernator i Alabamës, duke dalë në pension në vitin 1987 me shëndet të rënë. Ai vdiq më 13 shtator të vitit 1998 në moshën 79-vjeçare.

Më 15 maj të vitit 1972, Shtetet e Bashkuara i kthyen zyrtarisht Japonisë ishujt Okinava dhe Riukiu pas 27 vjet qeverisjeje amerikane.

Shtetet e Bashkuara i morën ishujt gjatë betejës tremuajshe me Japoninë në Luftën e Dytë Botërore. Nënpresidenti Spiro Agnju përfaqësoi presidentin Richard Nixon në ceremoninë për rikthimin e ishujve në Tokio. Zoti Agnju tha se kthimi i këtyre ishujve Japonisë zgjidhi dhe çështjen e fundit të luftës ndërmjet Shteteve të Bashkuara dhe Japonisë.

Kryeministri japonez Eisaku Sato shprehu vlerësimin e thellë për kthimin e grupit të ishujve, të cilat ndodhen ndërmjet Japonisë dhe Taivanit. Udhëheqësit në Okinava e hodhën poshtë ftesën për të marrë pjesë në ceremoni. Ata po protestonin kundër një klauzole të veçantë të traktatit, e cila lejonte Shtetet e Bashkuara të mbanin një bazë ushtarake në ishull dhe Japoninë të ngrinte një bazë ushtarake të sajën atje.// lk //

XS
SM
MD
LG