Zyrtarë të lartë të administratës së presidentit Bush thonë se CIA ndërhyri për të hequr një frazë, në një fjalim të presidentit tetorin e kaluar, në të cilën theksohej se Iraku ishte përpjekur të blente uranium nga Nigeri.
Gazeta Washington Post citonte zyrtarët, sipas të cilëve Drejtori i CIA-s George Tenet kishte bindur Shtëpinë e Bardhë ta hiqte këtë frazë pasi ishte marrë nga një burim i vetëm informacioni.
Gazeta citon një tjetër zyrtar të lartë, sipas të cilit CIA kishte dyshime në saktësinë e informacionit, i cili më pas rezultoi se ishte marrë nga dokumente të falsifikuara.
Incidenti ndodhi 3 muaj para fjalimit mbi gjendjen e vendit në janar, në të cilin ishte përfshirë një fjali jo aq specifike, që u tha se ishte marrë nga shërbimet britanike të zbulimit, mbi lidhjet ndërmjet Irakut dhe Nigerit.
Gazeta New York Times citon në numrin e saj të sotëm zyrtarë të lartë të paidentifikuar të administratës, sipas të cilëve zoti Tenet nuk e kishte lexuar atë pjesë të fjalimit mbi gjendjen e vendit, para se presidenti ta mbante fjalimin.
Shtëpia e Bardhë tha më pas se informacioni nuk duhet të ishte përfshirë në fjalim dhe zoti Tenet ka marrë përgjegjësinë për gabimin.
Sot, sekretari amerikan i Mbrojtjes Donald Rumsfeld e mbrojti Drejtorin e CIA-s dhe deklaratën mbi Nigerin.
Ai vuri në dukje se Britania ende e mbështet informacionin e saj dhe tha se askush nuk ka provuar deri tani se ky informacion është i pasaktë. Por ai tha se ky informacion nuk duhej të ishte përfshirë në fjalimin e presidentit mbi gjendjen e vendit.
//ze//