Koreja e Veriut ka rënë dakord në parim të marrë pjesë në raundin e dytë të bisedimeve shumëpalëshe mbi programin e saj bërthamor.
Njoftimi u transmetua të enjten nga radioja koreanoveriore, pas bisedimeve në Phenian midis udhëheqësit koreanoverior, Kim Jong Il dhe kryetarit të Asamblesë Popullore të Kinës, Wu Banguo.
Shtetet e Bashkuara dhe Japonia e mirëpritën lajmin. Një zëdhënës i Shtëpisë së Bardhë u tha gazetarëve se procesi shumëpalësh ofron shpresat më të mira për të bindur Korenë e Veriut që të heqë dorë nga programi i saj bërthamor.
Data për rifillimin e mundshëm të bisedimeve gjashtëpalëshe, në të cilat marrin pjesë dy Koretë, Shtetet e Bashkuara, Kina, Rusia dhe Japonia ende nuk është caktuar.
Raundi i parë që u zhvillua në Pekin në muajin gusht, përfundoi pa arritjen e ndonjë rezultati të rëndësishëm. Mjetet koreanoveriore të informimit thanë se Phenaini është i gatshëm për bisedime të mëtejshme nëse ato çojnë në atë që ato e cilësuan si zgjidhje të bazuar në parimin e veprimeve të njëkohëshme, por nuk dhanë hollësi të tjera.
Ndërkohë, televizioni shtetëror kinez tha se zoti Kim ka pranuar një ftesë nga Presidenti Hu Gjintao për të vizituar Kinën.//kk//