Gjykata e Hagës për Krimet e Luftës shtyu përsëri gjykimin e ish presidentit jugosllav, Sllobodan Milloshevic për arsye të shëndetit të të akuzuarit. Gjykata nuk vendosi ndonjë datë për të rifilluar procesin.
Shtyrja e gjyqit vjen një ditë pasi gjykata njoftoi se kryegjyqtari i çështjes do të japë dorëheqjen për arsye shëndetësore. Sëmudja e tensionit të lartë të gjakut dhe gripi kanë shtyrë disa herë gjykimin e ish presidentit jugosllav.
Sëmundja e gjykatësit Richard May, nuk dihet me saktësi, por ai ka në plan të largohet nga detyra më 31 maj, dita kur do të fillojë seanca vetëmbrojtëse e Sllobodan Millosheviçit.
Zyrtarë të Gjykatës së Hagës thonë se largimi i papritur i zotit May, nuk do ta ndërpresë gjyqin ndaj ish-presidentit jugosllav, por vëzhgues thonë se vendimi i zotit May mund të shkaktojë vonesa të mëtejshme të këtij procesi.