Drejtori i CIAs, Xhorxh Tenet dha dorëheqjen. Zoti Tenet, së bashku me zyrtarë të tjerë të lartë të administratës janë kritikuar për çështjen e informacioneve të zbulimit që i paraprinë ndërhyrjes amerikane në Irak dhe dështimin për të parandaluar sulmet terroriste të 11 shtatorit 2001.
Presidenti Bush tha dje se pranoi letrën e dorëheqjes së zotit Tenet gjatë një takimi të mërkurën mbrëma në Shtëpinë e Bardhë.
Presidenti e cilësoi zotin Tenet “një udhëheqës të fuqishëm dhe të aftë” dhe shtoi se ai dha dorëheqjen për arësye personale. Zoti Bush tha se i vinte keq të shikonte largimin nga detyra të zotit Tenet.
Në një fjalim emocional para punonjësve të CIA-s, zoti Tenet tha se vendimi i tij për të dhënë dorëheqje ishte i bazuar thjeshtë në mirëqënien e familjes së tij.
Ai vlerësoi gjithashtu punonjësit e CIA-s për punën e tyre të mrekullueshme, por vuri në dukje se e kaluara e agjencisë nuk është pa gabime.
Zoti Tenet do të qendrojë në postin e tij deri më 11 korrik dhe më pas drejtor në detyrë do të jetë zëvendës shefi i CIA-s, John McLaughlin.
//ze//