Lidhje

Afganistan: Talebanët kanë marrë peng dy ushtarë amerikanë në provincën Logar


Përfaqësues të luftëtarëve talebanë thanë se ata kanë marrë peng dy ushtarë amerikanë në provincën Logar, në lindje të Afgansitanit.

Talebanët e morën përgjegjësinë sot, dhe agjencia e lajmeve Reuters njoftoi se stacionet lokale radiofonike po transmetonin një ofertë të SHBA, për një shpërblim prej 20 mijë dollarësh për informacionet që mund të çojnë në lirimin e ushtarëve.

Zyrtarë afganë dhe të NATO-s nuk kanë komentuar rreth deklaratës së talebanëve.

Ndërkaq, po sot zyrtarë të NATO-s thanë se 5 ushtarë amerikanë janë vrarë në dy shpërthime të kryera në Afganistanin jugor, ku forcat ndërkombëtare kanë shtuar sulmet ndaj talibanëve.

Forca Ndërkombëtare e Sigurisë tha sot se 4 ushtarë u vranë nga aktivizimi i një bombe artizanale, një metodë e përdorur gjerësisht nga kryengritësit talebanë.

Më pas, NATO njoftoi vdekjen e një tjetër ushtari, në një tjetër shpërthim të ngjashëm.

Askush nuk ka marrë përgjegjësinë për sulmet.

Sekretari i Përgjithshëm i Kombeve të Bashkuara, Ban Ki Moon tha dje se plani i qeverisë afgane për të marrë përsipër sigurinë e vendit deri në vitin 2014, për të përmirësuarë qeverisjen dhe për të luftuar korrupsionin, do të jetë një proçes i gjatë e plot sfida.

Zoti Ban i bëri këto komente gjatë një takimi në Këshillin e Sigurimit, mbi një konferencë donatorësh, të cilën e bashkëdrejtoi në fillim të javës në Kabul.

XS
SM
MD
LG