Lidhje

Një komision i PE fton vendet e Bashkimit Evropian të njohin pavarësinë e Kosovës


Komisioni për politikë të jashtme i Parlamentit Evropian ka miratuar sot një Rezolutë për Kosovën nëpërmjet së cilës ftohen ato vende anëtare të Bashkimit Evropian që nuk e kanë njohur pavarësinë e Kosovës, ta bëjnë një gjë të tillë. Në të njëjtën rezolutë thuhet se Serbia duhet "të veprojë në mënyrë pragmatike ndaj statusit të Kosovës", megjithëse pranohet se "njohja e Kosovës tani për tani nuk është mundësi e pranuar politike për udhëheqjen në Beograd".

Deputetja nga Austria, Ulrike Lunacek, e cila është edhe raportuese për Kosovën, tha se ky është një lajm shumë i mirë dhe një rezultat i mirë për Kosovën, ndërsa ka shprehur bindjen se edhe në seancën plenare të Parlamentit Evropian, më 7 korrik në Strasburg, do të votohet me shumicë të madhe votash në favor të kësaj rezolute. Ajo tha se Parlamenti Evropian edhe kësaj radhe konfirmoi se e sheh të ardhmen e Kosovës në Bashkimin Evropian si një shtet të pavarur.

Në Kosovë, autoritetet thanë se një shqiptar është arrestuar në lidhje me krime të luftës. Zëdhënësja e Misionit të Bashkimit Evropian për policinë dhe drejtësinë, Kristina Herodes, njoftoi se në rajonin e Gjakovës, Departamenti Ekzekutiv i Policisë së EULEX-it, ka kryer një bastisje në një shtëpi dhe ka arrestuar një të dyshuar. Rasti është pjesë e hetimeve të vazhdueshme të EULEX-it mbi keqtrajtimet e mundshme të personave të mbajtur në objektet e ish Ushtrisë Çlirimtare të Kosovës në veriun e Shqipërisë gjatë konfliktit të viteve 1998-1999.

Lidhur me këtë rast janë identifikuar edhe dy të dyshuar të tjerë, thuhet në njoftimin e EULEX-it në të cilin nuk janë dhënë hollësi të tjera e as identiteti i të arrestuarit. Ky është rasti i dytë iu arrestimeve lidhur me akuzat e njëjta që kanë të bëjnë me veprimet e ish luftëtarëve shqiptarë në bazat e tyre ne veriun e Shqipërisë.

XS
SM
MD
LG