Lidhje

GDN mbështet sovranitetin e Kosovës, shpreh shqetësimin për zhvillimin ekonomik


GDN mbështet sovranitetin e Kosovës, shpreh shqetësimin për zhvillimin ekonomik
GDN mbështet sovranitetin e Kosovës, shpreh shqetësimin për zhvillimin ekonomik

Grupi Drejtues Ndërkombëtar për Kosovën ka rikonfirmuar sot mbështetjen e tij të plotë për siç thuhet. “Kosovën e pavarur, plotësisht sovrane, demokratike dhe shumetnike brenda kufijve të saj aktual”. Në takimin e sotëm në Prishtinë ky grup ka diskutuar përparimet në zbatimin e planit të krye negociatorit Martti Ahtisari, ka vlerësuar lartë tejkalimin e krizës politike me zgjedhjen e presidentes së Kosovës dhe ka shprehur mbështetjen për procesin e reformës kushtetuese dhe legjislative për të forcuar besueshmërinë dhe legjitimitetin e demokracisë në Kosovë.

Në përfundimet e takimit grupi ka shprehur shqetësimet për çështjet e zhvillimit ekonomik dhe disiplinën buxhetore e fiskale në Kosovë, duke e nxitur qeverinë që të përpiqet për përparime në këtë fushë dhe fusha tjera të rëndësishme që kanë ndikim të drejtpërdrejtë në jetën e të gjithë qytetarëve dhe në qëndrueshmërinë e tërë vendit, përfshirë arsimin dhe shëndetësinë, sundimin e ligjit, pajtimin si dhe kujdesin domethënës për komunitetet pakicë. Grupi ka mirëpritur angazhimin e Kosovës në bisedimet e ndërmjetësuara nga Bashkimi Evropian dhe inkurajon Kosovën dhe Serbinë, që si fqinjë të pavarur dhe sovran, të vazhdojnë kërkimin e marrëveshjeve për çështjet e interesit praktik për qytetarët e tyre.

Grupi shpreh besimin se krahas avancimit të pajtimit dhe qëndrueshmërisë rajonale, dialogu mund të ndihmojë përmirësimin e cilësisë së jetës së qytetarëve të të dyja vendeve, ndihmojë normalizimin e marrëdhënieve të tyre dhe të ndihmojë në rrugët e tyre drejt anëtarësimit në Bashkimin Evropian.

Grupi e vlerëson gatishmërinë e Qeverisë së Kosovës për bashkëpunim të plotë me EULEX-in në hetimin e pretendimeve të raportuesit të Këshillit të Evropës, Dick Marty dhe mirëpret krijimin e task forcës së posaçme për hetimin e këtyre pretendimeve. Diplomatët thanë se në takim është diskutuar edhe gjendja në veriun e Kosovës të banuar me shumicë serbe dhe ndonëse kjo çështje nuk është përfshirë në përfundimet e takimit, aty është ritheksuar qëndrimi se nuk mund të ketë ndarje të Kosovës dhe as shndërrim të veriut në një konflikt të ngrirë për një kohë të gjatë.

XS
SM
MD
LG