Një specialist kompiuterash nga Bangladeshi, i cili po komplotonte me një klerik ekstremist për të hedhur në erë një avion, do të kalojë 30 vjetët e ardhshme në burg.
Një gjykatë britanike e dënoi sot 31-vjeçarin Raxhid Karim me deri në 30 vjet burgim. Gjykata e shpalli të akuzuarin fajtor për 4 akuza për planifikimin dhe ndihmën e dhënë për akte terroriste gjatë kohës kur punonte për shoqërinë e fluturimeve British Airways.
Zyrtarët britanikë thonë se Raxhid Karim i kishte dërguar një numër mesazhesh në kod klerikut radikal të lindur në Shtetet e Bashkuara Anwar Al-Avlaki, ku i propozonte të përdoreshin sulmet vetëvrasëse ose letrat-bombë për të hedhur në erë avionë që udhëtonin për në Shtetet e Bashkuara.
Al-Avlaki është një klerik mysliman që ka lidhje me al-Kaidën. Zyrtarët e zbulimit besojnë se ai strehohet në Jemen.