Lidhje

Kosovë: Vazhdon gjyqi kundër Limajt dhe 3 bashkëluftëtarëve të tij


Trupi gjykues i drejtuar nga EULEX-i vendosi sot që procesi gjyqësor për krime lufte kundër deputetit Fatmir Limaj dhe tre bashkëluftëtarëve të tij të vazhdojë, ndërsa gjashtë të tjerë u shpallën të pafajshëm.

Sipas gjykatës, procesi do të vazhdojë kundër Fatmir Limajt, Naser Shalës, Naser Krasniqit e Nexhmi Krasniqit, meqë trupi gjykues vlerëson se për shkak të përgjegjësive komanduese gjatë luftës, duhet të shqyrtohen disa dyshime që kanë të bëjnë me veprimet e tyre.

Në këtë mes nuk hyjnë dëshmitë e dëshmitarit kryesor të çështjes Agim Zogaj, meqë më 21 mars, meqë trupi gjykues kishte vlerësuar se deklaratat dhe ditarët e dëshmitarit Agim Zogaj, i cili qe bërë i njohur si dëshmitari X, janë të papranueshme dhe kishte urdhëruar lirimin e menjëhershëm të të akuzuarve nga paraburgimi.

Në verën e vitit të kaluar, zoti Limaj dhe nëntë pjesëtarë të ish Ushtrisë Çlirimtare të Kosovës, u akuzuan për krime lufte kundër popullatës civile dhe krime lufte kundër të burgosurve të luftës, që, siç thuhet, supozohet të jenë kryer nga fillimi i vitit 1999 deri në mesin e qershorit të atij viti, në një qendër të improvizuar paraburgimi nga Ushtria Çlirimtare e Kosovës, e cila ndodhej në fshatin Kleçkë në Kosovën qendrore.

Akuza mbështetej kryesisht mbi dëshmitë e një ish pjesëtari të Ushtrisë Çlirimtare, Agim Zogaj, i cili qe bërë i njohur si dëshmitari X, deri në muajin shtator të vitit të kaluar, kur kreu vetëvrasje në Gjermani. Ai ishte dërguar atje nga autoritetet e EULEX-it, në cilësinë e dëshmitarit të mbrojtur. Ai për një kohë kishte mbajtur ditar ku kishte shënuar ngjarjet e përfshira në akuzë.

Procesi gjyqësor, që sot serish shënoi një kthesë, paraqet rastin e dytë që deputeti Fatmir Limaj hidhet në gjyq nën akuzat për krime lufte. Më 30 nëntor të vitit 2005 Gjykata Ndërkombëtare për Krime lufte në Hagë shpalli të pafajshëm Fatmir Limajn i njohur me emrin e luftës si komandant Çeliku, i cili në shkurt të vitit 2003 qe akuzuar për përfshirje në krime kundër civilëve shqiptarë dhe serbë gjatë luftës së vitit 1998.

Dell: Korrupsioni – një nga kërcënimet kryesore për Kosovën

Ambasadori amerikan, Christopher Dell tha se korrupsioni, në të gjitha format e tij, është bërë njëri prej kërcënimeve kryesore me të cilat përballet shoqëria e Kosovës. Ai i bëri këto komente në ceremoninë e diplomimit të kandidatëve të Institutit Gjyqësor të Kosovës për gjyqtarë dhe prokurorë. Në fjalimin e tij 20 minutash, ai tha se problemi më i madh qëndron tek fakti se zyrtarët e korruptuar nuk duan që të gjenden faktet. Ata disponojnë një numër të madh të mjeteve për të fshehur të vërtetën: paratë, përkrahësit, gatishmërinë për të kërcënuar dhe detyruar më të dobëtit. Ai tha se udhëheqësit e partive politike duhet të jenë në ballë të përpjekjeve për ndryshimin e situatës dhe duhet t’i japin fund botëkuptimit se korrupsion është vetëm kur e bën dikush tjetër.

“Të gjithë anëtarët e partive politike bëjnë me gisht nga njëri-tjetri duke thënë se ata janë të korruptuarit. Por, disa prej atyre që bëjnë me gisht janë po aq të gatshëm të mbushin kutitë e votimit, t’ua gjejnë anëtarëve të familjeve së tyre ndonjë vend të mirë pune në qeveri dhe t’ua mundësojnë miqve të tyre marrjen e kontratave të leverdishme afariste kur kjo gjë është në interesin e tyre. Më lejoni të jem i qartë: nuk po përjashtoj asnjë parti nga ky pohim”, tha ambasadori Dell.

Ai tha se nganjëherë njohuria për veprimtaritë korruptive mbahet më qëllim e fshehtë në mënyrë që kushdo që ka këtë informatë, mund ta përdorë si "policë sigurimi", një praktikë që ai e cilësoi të neveritshme. Këto vepra kryhen pa asnjë ndëshkim dhe kjo me të vërtetë e bën të qartë se sa keq është gjendja.

“Në veçanti po mendoj për zgjedhjet e vitit 2010 kur edhe të vdekurit ushtruan të drejtën për të votuar! Po ashtu duket se këtu mbizotëron ideja se partitë e ndryshme kanë të "drejtën" për të kontrolluar pasuritë e ndryshme publike. Kam dëgjuar aq shpesh ish-zyrtarët e lartë publikë duke e thënë këtë gjë të pavetëdijshëm, ose ndoshta pa u brengosur se kjo përbën shkelje të standardeve etike në shumicën e shoqërive moderne. Në të vërtetë, kjo duket si mbetje nga e kaluara socialiste e Kosovës, diçka që pasqyron praktikat më të këqija të sistemit politik të Serbisë”, theksoi ambasadori Dell.

Duke kritikuar ashpër edhe dukurinë e familjarizimit, ai kërkoi angazhim edhe nga vetë qytetarët e Kosovës, ndërsa një vëmendje të posaçme u kushtoi edhe mjeteve të informimit, të cilat sipas tij shpesh nguten për të akuzuar të tjerët për korrupsion dhe gjëra të tjera, pa një analizë që do të mundësonte punën e tyre të ligjshme në mënyrë më të përgjegjshme dhe më efektive.

“Ç'është edhe më keq, ne të gjithë kemi dëgjuar për rastet kur gazetarët janë paguar për të botuar artikuj që promovojnë ose sulmojnë individë apo institucione në funksion të agjendave të tyre private. Për më tepër, gazetat dhe mediet e tjera shpesh janë pronë e individëve që kanë interesa të fuqishme politike personale dhe përdorin mjetet e tyre të shtypit për të shpërndarë çfarëdo ngjarje sensacionale që do të çojë përpara kauzën e tyre e jo të vërtetën. Është e diskutueshme se a i plotëson standardet moderne të gazetarisë së paanshme dhe etike kur dikush shfrytëzon mjetet e veta mediatike për të shtyrë përpara agjendën e vet politike. Kjo përkeqësohet kur redaktorët falin përdorimin e faqeve të supozuara të lajmeve për të botuar editoriale të maskuara tinëz që promovojnë agjendat partiake”, theksoi ai

Ambasadori Dell tha se Kosova nuk e ka mbështetur sa duhet Agjencinë e saj kundër korrupsionit, ndërsa kritikoi ashpër të gjithë ata që sipas tij, krijuan pothuajse një terren luftarak kur Presidentja Atifete Jahjaga shpalosi qëllimin e saj për të krijuar një këshill kombëtar për luftën kundër korrupsionit.

Duke numëruar dëmet që korrupsioni shkakton Kosovës në pengimin e rimëkëmbjes së saj ekonomike, ai nënvizoi se kjo dukuri dëmton marrëdhëniet e Kosovës me partnerët ndërkombëtarë, duke i bërë përkrahësit e Kosovës që të orientojnë investimet e tyre diku tjetër.

Presidentja e Kosovës Atifete Jahjaga tha ndërkaq se e ardhmja e Kosovës varet nga serioziteti në luftën kundër korrupsionit dhe krimit të organizuar.

“Kjo është edhe esenca e Këshillit Kombëtar Kundër Korrupsionit që unë e kam themeluar muajin e kaluar, ku u shpreh uniteti dhe përkushtimi institucional për ta bërë luftën kundër korrupsionit prioritet. Si angazhim gjithëpërfshirës për të siguruar të gjitha kushtet e nevojshme që gjyqtarët tanë të mos pengohen në vënien e drejtësisë”, tha presidentja Jahjaga.

Lufta kundër krimit të organizuar dhe korrupsionit është një prej kritereve themelore për përmbushjen e aspiratave të Kosovës për afrim me strukturat euroatlantike.

Trego komentet

XS
SM
MD
LG