Lidhje

Opozita mund të kërkojë mocion mosbesimi ndaj kryeministrit Berisha

  • Armand Mero
  • Tiranë

Opozita mund të kërkojë mocion mosbesimi ndaj kryeministrit Berisha

Opozita mund të kërkojë mocion mosbesimi ndaj kryeministrit Berisha

Socialistët mund të tentojnë një provë force në parlament me shumicën duke kërkuar një mocion mosbesimi ndaj kryetares së parlamentit Jozefina Topalli por edhe ndaj kryeministrit Sali Berisha. “Të mendojmë e vendosim për të kërkuar një seancë të jashtëzakonshme të Kuvendit, lidhur me këtë dështim të madh në rrugën e integrimit, dhe le të shikojmë mundësinë e nismës së mosbesimit të kryetares si një pengesë e identifikuar deri nga vetë Komisioni Europian për arritjen e standardeve europiane në jetën parlamentare të vendit. Një nisëm mosbesimi, pikërisht për këtë dështim të pashoq, meriton edhe kreu i kësaj qeverie të dalë nga votat e vjedhura që po vjedh të ardhmen e këtij vendi për të mbajtur pushtetin e oborrit e pasuruar oborrin e pushtetit”, deklaroi kryetari socialist Edi Rama ne mbledhjen e Asamblesë kombëtare.

Ndërsa mocioni ndaj zonjës Topalli është më lehtë i realizueshëm, ai ndaj kryeministrit, për shkak të ndryshimeve kushtetuese të aprovuara me konsensusin e palëve, është më i ndërlikuar, pasi opozita duhet të paraqitet me kandidaturën e një kryeministri për të kërkuar mosbesimin e zotit Berisha. Por zoti Rama tha se ai mund të jetë një akt i dobishëm, pavarësisht se mund të mos sjell rrëzimin e qeverisë ndaj së cilës ai përsëriti sërish ofertën për zgjidhjen e ngërcit politik lidhur me hetimin e zgjedhjeve të kaluara: “Ofertën tonë të re qeveria e ka në tavolinë. Është një shqipërim i drejtpërdrejtë i Rezolutës së Parlamentit Europian. Është një ofertë e re që ka marrë deri sot një përgjigje të vjetër. Asnjë fjalë nuk ka në tekstin e asaj oferte për fletët e votimit, sepse, shqip fare, nuk i kërkojmë fletët e votimit për këtë hetim. Për t’i dhënë fund kushtëzimit të marrëdhënies me parlamentin na mjaftojnë kutitë e materialeve zgjedhore në dispozicion të komisionit hetimor dhe pastaj të gjitha informacionet e nevojshme shtetërore që lidhen me përmbajtjen e çdo kutie që duam të hetojmë”.

Por kryeministri Berisha ka deklaruar se në një rast të tillë fletët e votimit do të digjen e për pasojë edhe mundësia që për to të kërkohet një interpretim nga gjykata kushtetuese apo komisioni i Venecias

Gjatë mbledhjes së sotme zoti Rama deklaroi se opozita do të vazhdojë të denoncojë aferat e korrupsionit. Fushata e socialistëve u pasua me kundërakuza të cilat vunë në qendër zotin Rama në funskionin e tij si kryetar Bashkie lidhur me lejet e ndërtimit: “Makina e baltës ka mbiprodhuar shpifjen e lejeve të ndërtimit që betonizuan Tiranën nën qeverisjen tonë. Po a e dini të dashurit e mi sesa përqind e territorit të këtij qyteti është ndërtuar me lejet e këtyre dhjetë vjetëve – në fakt nëntë vjet sepse vitin e fundit s’është dhënë asnjë leje? Vetëm 1%! 35 kateshat te zona e Liqenit pwr tw marrw unw 20 pwrqindwshin nepermjet Tan Lepurit, nuk e kam votuar ndërrimin e destinacionit të asaj zone, siç nuk kam votuar asnjë leje ndërtimi në Tiranë në vitet 2005-2007, ku çdo leje është dhënë me shumicën vendimmarrëse të Saliut në KRRT.

Sipas zotit Rama, Shqipëria ndodhet në një krizë të thellë dhe se “shpresa e vetme për shqiptarët - tha ai - është partia socialiste dhe opozita e bashkuar”. Për këtë arsye ai bëri thirrje që opozitës t’i bashkohen edhe forca të tjerë si LZHK e që në gjirin e partisë socialiste të përfshihen edhe ata që sic tha zoti Rama u larguan për t’iu bashkuar vite më parë zotit Meta. Kryetari sïcialist kërkoi që edhe brenda partisë së tij të lihen mënjanë ndarjet e të gjithë të bashkohen në emwr të interesit të shqiptarïve u shpreh zoti Rama: “Një apel për t’u bashkuar më shumë e më fort se kurrë, jo në emër të shuarjes së dallimeve tona si njerëz të ndryshëm, me mendime e qasje shpeshherë të ndryshme ndaj gjërave dhe ndaj vetë njëri-tjetrit, po në radhë të parë në emër të atyre qindra mijërave që e shohin e dëgjojnë ç’bëjmë e ç’themi ne përditë me bindjen se jemi për ta e vetmja shpresë”.

Socialistët vendosën që t’i kërkojnë dhe një herë kryeministrit Berisha të rishikojë ofertën e tyre duke deklaruar se në rast të kundërt protestat do të shtrihen në të gjithë vendin për të kërkuar largimin e tij.

XS
SM
MD
LG