Lidhje

Qosja: Shpallja e pavarësisë - ngjarja më e rëndësishme në historinë e Kosovës

  • Leonat Shehu

Qosja: Shpallja e pavarësisë - ngjarja më e rëndësishme në historinë e Kosovës

Qosja: Shpallja e pavarësisë - ngjarja më e rëndësishme në historinë e Kosovës

Akademik Rexhep Qosja i tha Zërit të Amerikës se shpallja e pavarësisë së Kosovës katër vjet më parë, ishte ngjarja e dytë më e madhe brenda një periudhe 100 vjeçare në historinë e popullit shqiptarë. Në përvjetorin e katërt të pavarësisë së Kosovës, zoti Qosja thotë se vendi ka mjaft sfida para vetes, por ndërtimi i shtetit është një proces dhe katër vjet janë pak për një shtet. Po gjatë kësaj periudhe tha ai, Kosova ka bërë disa përpjekje të suksesshme.

“E para ka bërë përpjekje të suksesshme në fushën e ndërtimit dhe stabilizimit, konsolidimit të institucioneve shtetërore dhe madje institucioneve shtetërore demokratike. Ka bërë përpjekje të suksesshme në fushën e ndërtimit dhe të konsolidimit të Forcës së Sigurisë së Kosovës, ka bërë përpjekje të suksesshme në ndërtimin dhe konsolidimin e policisë së Kosovës që janë dy sektorët them unë më të mirët, më të organizuar më shembullor në Kosovë. Ka bërë përpjeke të suksesshme në fushën e arsimit dhe disa fusha të tjera si biznesi”, tha akademik Qosja.

Por, ai tërheq vërejtjen se në disa fusha përpjekjet ishin më të pakta.

“Më pak përpjekje të suksesshme janë bërë sidomos në fushën e shëndetësisë dhe fushën e kulturës. Po ashtu nuk mund të jemi të kënaqur me përpjekjet e bëra në parandalimin e korrupsionit dhe krimit të organizuar”, tha ai.

Zoti Qosja nënvizon ndërkaq sfidën e veriut të Kosovës të banuar më shumicë serbe ku nuk njihen e nuk pranohen institucionet e shtetit të Kosovës. Ai tha se përpjekjet për shtrirjen e autoritetit të Prishtinës në veri të filluara në korrikun e vitit të kaluar ishin të rëndësishme.

“Por aty mjerisht do të ketë ende punë. Serbia përpiqet që t'i shkaktoj probleme e vështirësi Kosovës, Serbia financon institucionet paralele, në një mënyrë organizon dhe financon një krim në veriun e Kosovës, por me ndihmën edhe të faktorëve ndërkombëtarë edhe kjo do të kalohet një ditë, sigurisht jo larg dhe Kosova do të funksionoj ashtu si edhe po funksionon në krejt territorin e saj me përjashtim të veriut, si shtet sovran”, tha ai.

Akademik Qosja thotë se njohja e Kosovës nga mbi 80 vende të botës është njohje cilësore, meqë këtë e kanë bërë vendet më të rëndësishme të botës. Ai nënvizon ndërkaq rëndësinë që ka fakti se viti 2012 do të shënojë përmbylljen e mbikëqyrjes së pavarësisë së Kosovës.

XS
SM
MD
LG