Marrëdhëniet e Shqipërisë me Bashkimin Evropian kanë shënuar pika përparimi gjatë kohëve të fundit, pas vendimit të parlamentit evropian për heqjen e vizave, ndërkohë që vendi pret vendimin zyrtar për liberalizimin e tyre si dhe përgjigjen nga BE-ja lidhur me kerkesën e saj për anëtarësi në familjen evropiane. Por megjithë përparimet, Shqipëria ka ende shumë për të bërë, në drejtim të reformave të brendshme. Vendi ka mbetur në udhëkryq që pas zgjedhjeve të qershorit 2009, për të cilat opozita thotë se janë vjedhur votat, por nga ana tjetër pranon rezultatin dhe kërkon transparencën e procesit të votimit. Opozita ka paralajmëruar se do t’i kthehet përsëri rrugës së protestave, ndërkohë që vendi po i drejtohet zgjedhjeve të tjera, atyre lokale. Për të biseduar më gjatë mbi marrëdhëniet pozitë opozitë dhe strategjinë e opozitës shqipëtare, sot kemi të ftuar në studio, zoti Erion Velija, në cilësinë e bashkërenduesit të opozitës në Shqipëri.