Lidhje

Bota reagon ndaj ngjarjeve në Egjipt pas dorëheqjes së zotit Mubarak


Bota reagon ndaj ngjarjeve në Egjipt pas dorëheqjes së zotit Mubarak

Bota reagon ndaj ngjarjeve në Egjipt pas dorëheqjes së zotit Mubarak

Edhe udhëheqësit botërorë bënë reagimet e tyre ndaj dorëheqjes së presidentit egjiptian Mubarak dhe kalimit të pushtetit në duart e ushtrisë. Ata kanë bërë thirrje për një kalim të shpejtë të pushtetit në duart e një qeverie demokratike. Ndërkohë, në qytetet në mbarë Lindjen e Mesme kanë patur festime në mbështetje të protestave anti qeveritare në Egjipt që detyruan largimin nga pushteti të personit që e sundoi vendin për tri dekada. Por fillimisht ju njohim me një reagim brenda vendit, atë të grupit Vëllazëria Myslimane, grupimi më i madh opozitar, njëkohësisht një parti islamike.

Grupi Vëllazëria Myslimane sot tha se nuk do të paraqesin kandidat për president të Egjiptit, dhe nuk do të kërkojë pjesëmarrje në qeverinë e tranzicionit, pas dorëheqjes së Hosni Mubarakut dhe kalimit të pushtetit në duart e ushtrisë.

“Ne jemi në shërbim të popullit, por nuk kemi aspirata për të marrë pushtetin. Nuk do të ofrojmë kadidatë për president dhe nuk do të kërkojmë pjesëmarrje në qeverinë e tranzicionit.”

Ndërkohë, bota ka reaguar pas vendimit të presidentit të Egjiptit Mubarak për të dhënë dorëheqjen. Kina ka reaguar me kujdes ndaj këtij lajmi, duke bërë thirrje për stabilitet. Partia komuniste e Kinës lëshoi një deklaratë sot ku thuhet se fuqitë e huaja nuk duhet të përzihen në politikën e Egjiptit. Ekspertët thonë se Pekini druhet se ngjarjet në Egjipt mund të nxisin protesta të njejta kundër qeverisë kineze. Faqet elektronike kineze kanë kufizuar publikimin e komenteve ndaj ngjarjeve në Egjipt.

Ndërsa kryeministrja e Australisë Julia Gillard sot i bëri thirrje Egjiptit që të vendosë një afat qartë për mbajtjen e zgjedhjeve të lira dhe të drejta. Kryeministri japonez Naoto Kan tha se Japonia shpreson që Egjipti do të luajë një rol më konstruktiv se më parë në rajonin e Lindjes së Mesme. Në Kombet e Bashkuara në Nju Jork, Sekretari i Përgjithshëm Ban Ki Mun vlerësoi durimin e protestuesve. “Zëri i popullit egjiptian, veçanërisht i rinisë, u dëgjua dhe u përket atyre të përcaktojnë të ardhmen e vendit të tyre,” tha sekretari i përgjithshëm i OKB-së Ban Ki Moon. Shefja e politikës së jashtme të Bashkimit Evropian, Kethrin Ashton, tha se Evropa qëndron përkrah popullit egjiptian. Ajo gjithashtu bëri thirrje për shpejtimin e dialogut për krijimin e një qeverie që do të përmbushte aspiratat e popullit. Kryeministri britanik Dejvid Kameron i bëri thirrje Egjiptit të ndërmarrë hapa drejt krijimit të një qeverie demokratike, ndërkohë që kancelarja gjermane Angela Merkel e quajti ndryshim historik dorëheqjen e zotit Mubarak. Edhe presidenti francez Nikolas Sarkozi bëri thirrje për zgjedhje të lira. Në Lindjen e Mesme njerëzit e pritën me gëzim dorëheqjen e presidentit egjiptian dhe e uruan popullin e Egjiptit. Në kryeqytetin e Libanit, Bejrut, banortë shprehën gëzim që zoti Mubarak u largua nga pushteti.

“Uroj popullin e Egjiptit për përmbysjen e tiranisë. Kjo është fitorja më e madhe për popullin arab,” tha banroi i Bejrutit Mahmud Kemal.

Edhe irakianët në rrugët e Bagdadit ishin të gëzuar nga lajmi për rrëzimin e pushtetit të zotit Mubarak.

“Ne, irakianët, jemi të gëzuar për popullin egjiptian dhe përpjekjet e revolucionit të bardhë,” tha durgam Al Zaidim nga Bagdati.

“Mendoj se dorëheqja ishte e vonuar, zoti Mubarak duhet të kishte dhënë dorëheqjen më herët, sepse këtë kërkonte populli. Për Izraelin kjo ndoshta do të jetë e rrezikshme derisa të vendoset se kush do të vij në pushtet. Shpresoj të fitojë pala demokrate dhe jo Vëllazëria Myslimane.”- tha ky banor i Jeruzalemit.

XS
SM
MD
LG