Amerikanët po zhvillojnë ceremoni të ndryshme për të shënuar 150 vjetorin e fillimit të luftës civile.
Lufta filloi me 12 prill 1861, me një sulm nga trupat e konfederatës ndaj trupave të Unionit që kishin pushtuar Fort Sumter në portin e qytetit bregdetar të Karolinës së Jugut, Çarlston.
Rreth 600 mijë amerikanë vdiqën gjatë luftës mes shteteve të veriut dhe atyre të jugut.
Shkaku i vërtetë i luftës është ende i diskutueshëm. Disa ekspertë thonë se lufta nisi mbi të drejtën për t’u ndarë nga Unioni, dhe për të formuar Konfederatën e Shteteve të Amerikës. Ndërsa të tjerë thonë se 11 shtetet e jugut deshën të ndaheshin për të mbrojtur praktikën e tyre të skllavërisë, e cila kundërshtohej nga presidenti i asaj kohe Abraham Linkoln.