Të paktën 18 persona njoftohet të kenë vdekur ndërsa trupat siriane dhe tanket vërshuan sot në qytetin e Darës, ku janë zhvilluar protesta ditët e fundit. Ky veprim u kritikua nga Kombet e Bashkuara. Dëshmitarët në rajonin jugor të Sirisë thonë se ushtria demonstroi forcën ndërsa autoritetet zgjeruan fushatën e tyre kundër kryengritjes antiqeveritare që filloi pesë javë më parë.
Dëshmitarët thanë sot se panë trupa në një makinë që ishte sulmuar nga forcat e sigurimit në Dara, pasi tanket dhe ushtarët hynë në qytet. Grupet e të drejtave të njeriut kanë njoftuar gjithshtu se forcat e sigurimit hapën zjarr në Douma, një lagje periferike e Damaskut, kryeqytetit të Sirisë. Komisionerja e lartë e Kombeve të Bashkuara për të Drejtat e Njeriut, Navi Pillay kërkoi që Siria të mos përdorë dhunën për shtypjen e demonstuesve dhe të zhvillojë hetime për vrasjet e kryera.
Shtetet e Bashkuara e dënuan dhunën kundër qytetarëve sirianë, duke e thënë se ajo është “për të ardhur keq”. Një zëdhënës i Këshillit të Sigurimit Kombëtar tha se SHBA po shqyrtojnë përgjigjen ndaj masave shtypëse të qeverisë siriane, përmes një sërë sanksionesh, për ta bërë të qartë se sjellja e Damaskut është “e papranueshme”.