Lidhje

Bota dënon lëshimin e raketës nga Koreja e Veriut

  • Zëri Amerikës

Sekretari i Përgjithëshëm i Kombeve të Bashkuara Ban Ki-moon u është bashkuar udhëheqësve ndërkombëtar në dënimin e Koresë së Veriut për lëshimin e raketës me rreze të gjatë veprimi e cila u shpërbë mbi det pak momente pas lëshimit. Zoti Ban tha se pavarësisht dështimit, veprimet e Phenianit janë për të ardhur keq dhe bien ndesh me qendrimin e vendosur unanim të komunitetit ndërkombëtar. Ndërkohë zëdhënësi i Shtëpisë së Bardhë, Jay Carney, e kritikoi lëshimin, duke thënë se kjo kërcënon sigurinë rajonale dhe tregon se Peniani preferon të bëjë shpenzime të kota për armatim dhe propagandë ndërkohë që populli i Koresë së Veriut vuan nga uria.

Zyrtarët thonë se me sa duket, raketa u shpërbë dhe u rrëzua në det pak pas lëshimit. Agjencia zyrtare e lajmeve të Koresë së Veriut e pranoi dështimin e raketës me tre faza.
“Republika Popullore Demokratike e Koresë lëshoi satelitin e parë nga pista e lëshimit në Cholsan të provincës së Phyongan-it Verior në orën 7:38 të mëngjesit të së premtes. Sateliti për studimin e tokës nuk arriti të futej në orbitë. Shkencëtarët, teknikët dhe ekspertët po shqyrtojnë shkakun e dështimit.”

Shtëpia e Bardhë publikoi menjëherë një deklaratë, që kritikonte lëshimin e raketës së dështuar. Sekretari i Shtypit Jay Carney tha se raketa përbënte kërcënim për sigurinë rajonale.

Koreja e Jugut e dënoi lëshimin si shkelje të rezolutave të Këshillit të Sigurimit të Kombeve të Bashkuara që e ndalojnë Phenianin të zhvillojë teste me raketa ballistike. Ministri i Jashtëm Kim Sung-Hwan tha se Seuli po studion kundërmasat.

“Qeveria jonë dënon fuqishëm Korenë e Veriut për lëshimin e raketës duke mospërfillur thirrjet e njëzëshme nga komuniteti ndërkombëtar që të hiqej dorë nga plani. Koreja e Veriut duhet të mbajë përgjegjësi të plotë për këtë.”

Zëvendës Sekretari i kabinetit japonez, Osamu Fujimura paralajmëroi se Japonia e shikon këtë veprim si provokacion.
“Duhet të themi se ky ishte një procvokacion serioz kundër sigurisë së vendit tonë, dhe në kundërshtim me rezolutat e Këshillit të Sigurimit. Është për të ardhur keq dhe ne kemi protestuar ashpër përmes rrugëve diplomatike.”

Forcat japoneze të mbrojtjes, sëbashku me ushtrinë e Koresë së Veriut dhe atë amerikane në rajon, dislokuan bateri kundër raketave në tokë dhe det për ta rrëzuar raketën nëse ajo do të kalonte mbi territorin japonez apo Jugkorean.

XS
SM
MD
LG