Policia britanike thotë se një bombë e gjetur në një avion transporti në një aeroport britanik muajin e kaluar, ishte parashikuar që të shpërthente në pjesën lindore të Shteteve të Bashkuara.
Bomba ishte njëra prej dy të tillash të dërguara nga Jemeni drejt sinagogave në qytetin e Çikagos. Ato ishin fshehur në kutitë e bojës së printerave dhe ishin dërguar përmes sistemit postar UPS. Ato u kapën në Britani dhe Emiratet e Bashkuara Arabe.
Në një deklaratë të policisë britanike sot thuhej se nëse paisja shpërthyese e gjetur në Britani nuk do të ishte hequr nga avioni, “ajo mund të ishte aktivizuar në brigjet lindore të Shteteve të Bashkuara”.
Dega e al-Kaidës në Jemen mori përgjegjësinë për komplotet me bomba.
Grupi kishte thënë gjithashtu se ishte përgjegjës për rrëzimin e një avioni të UPS-it në Emiratet e Bashkuara Arabe në shtator, një pretendim që sipas njoftimeve Shtetet e Bashkuara e kishin hedhur poshtë.
Një buletin i brendshëm i FBI-së dhe Departamenti i Sigurisë Kombëtare , i siguruar nga Associated Press thotë se organizatat terroriste shpesh marrin përgjegjësi për ngjarje të tilla për të konsoliduar imazhin e tyre.