Lidhje

Rasti i britanikëve myslimanë


Zyra e Kryeministri britanik, David Cameron tha se ai do të "shqyrtojë" rastet e myslimanëve britanikë të cilëve në minutën e fundit u është mohuar leja për të udhëtuar me avion për në Shtetet e Bashkuara.

Deklarata e Kryeministrit erdhi pas një ankese të bërë nga një ligjvënëse britanike në emër të një familjeje, së cilës i ishte mohuar leja për të udhëtuar në Kaliforni më 15 dhjetor. Një anëtar i familjes prej 11 anëtarësh tha se nga anulimi ata kishin humbur 13 mijë dollarë, shuma që u kishin kushtuar biletat.

Një burim i qeverisë amerikane i tha agjencisë së lajmeve Sky News se një anëtar i familjes u gjykua si person i ndaluar për të fluturuar, por meqenëse familja i kishte rezervuar biletat së bashku, atyre iu mohua të gjithëve leja për të udhëtuar.

Deputetja britanike Stella Creasy, tha se është e shqetësuar për faktin që një numri në rritje familjesh myslimane britanike po u mohohet hyrja në Shtetet e Bashkuara pa ndonjë arsye të qartë.

Një zëdhënës i agjencisë amerikane për Doganat dhe Mbrojtjen Kufitare i tha Zërit të Amerikës se feja dhe besimi, apo besimet shpirtërore të një udhëtari të huaj nuk janë faktorë përcaktues nëse ai lejohet ose jo të hyjë në SHBA.

XS
SM
MD
LG