Një media shtetërore në Iran tha se anijet iraniane janë nisur për në ujërat pranë Jemenit, ndërkohë që Arabia Saudite vazhdon sulmet nga ajri për të ndalur përparimin e rebelëve shiitë të mbështetur nga Irani në Jemen. Sipas zyrtarëve të marinës iraniane, flota do të mbrojë interesat e Jemenit në det të hapur.
Sekretari amerikan i Mbrojtjes Ashton Carter tha sot se dega e Al-Kaidës në Jemen është duke përfituar nga luftimet mes rebelëve Houthi dhe forcave pro-qeveritare duke pushtuar territore në këtë vend, i cili po vuan nga mungesa e stabilitetit që nga viti 2012 kur udhëheqësi i tij i mëparshëm u rrëzua nga pushteti.
Sekretari Carter u tha gazetarëve gjatë një vizite në Japoni se kriza në Jemen i ka vështirësuar përpjekjet e Shteteve të Bashkuara për të luftuar Al-Kaidën në Gadishullin Arabik, dhe se operacionet ndaj këtij grupi do të ishin më të lehta nëse vendi do të kishte një qeveri më të qëndrueshme.
"Kërcënimi terrorist i këtij grupi ndaj perëndimit, përfshirë Shtetet e Bashkuara, është i gjatë dhe serioz", tha zoti Carter. Ai tha se lufta kundër Al-Kaidës në Gadishullin Arabik do të vazhdojë.
Sekretari amerikan i mbrojtjes tha gjithashtu se Shtetet e Bashkuara po i japin Arabisë Saudite informacione kundërzbulimi dhe survejimi për të ndihmuar forcat e koalicionit në luftën kundër rebelëve Houthi.
Dje, Zëvendës Sekretari amerikan i Shtetit Antony Blinken tha se qeveria amerikane është duke përshpejtuar dërgesat e armëve.