Në Tiranë parlamenti debatoi sot sërish për hetimet ndaj aferave korruptive me energjinë elektrike dhe kompaninë e shpërndarjes CEZ. Opozita këmbënguli të futet në punimet e parlamentit projekt-ligji i saj për hetime ndërkombëtare ndaj marrëveshjeve abuzive me energjinë. Por shumica socialiste nuk e futi kërkesën e opozitës në kalendarin e punimeve. Kontrolli i Lartë i Shtetit paditi ministrin e energjisë Damian Gjiknuri për shpërdorime detyre, që dëmtuan arkën e shtetit me afro 479 milionë euro.
Parlamenti shqiptar debatoi sot me tone të ashpra mbi hetimin ndërkombëtar që ka kërkuar opozita ndaj abuzimeve me financat e ish-kompanisë çeke të shpërndarjes së energjisë CEZ.
Deputetët e opozitës protestuan se kërkesa e tyre për të futur projekt-ligjin e saj në kalendarin e parlamentit nuk u plotësua përsëri. Kryetari i grupit parlamentar të Partisë Demokratike, Edi Paloka, tha se javën e kaluar socialistët nuk e futën në rendin e ditës me procedurë të përshpejtuar, ndërsa sot nuk e futën as në kalendarin afatgjatë të punimeve normale të parlamentit.
Sipas tij, ky pengim i projekt-ligjit për hetim ndërkombëtar mbi abuzimet dhjetëra milionë euro me arkën e shqipërisë dhe atë të kompanisë së shpërndarjes së energjisë tregon se kush janë përgjegjësit e vërtetë të këtyre aferave.
Opozita ka kërkuar që kryetari i parlamentit të japë dorëheqjen si i përzierë në këto afera korruptive nga koha kur ishte ministër i energjisë, ë mënyrë që prokuroria të hetojë e lirë nga pengesat që ai mund të sjellë.
Kryetari i grupit parlamentar të Partisë Socialiste, Gramoz Ruçi, tha se kërkesa e demokratëve për hetim përfshin vetëm pikën e fundit të marrëdhënieve me CEZ, jo një ndriçim të plotë të zhvillimeve shumëvjeçare, ndërsa prokuroria ka në dorë një padi nga KLSH dhe mund të fillojë hetimet, nëse e gjykon të arsyeshme.
Kontrolli i Lartë i Shtetit denoncoi dje për ndjekje penale ministrin e energjisë Damian Gjiknuri dhe juristen, të cilët përgatitën kontratën e fundit për mbylljen e konflikteve me CEZ me shtetin shqiptar.
KLSH deklaroi se dy zyrtarët i shkaktuan arkës së shtetit 479 milionë usd me kontratat që haraun me CEZ.
Ministri i energjisë, Damian Gjiknuri, deklaroi se akuzat nga KLSH ndaj tij sulme të pastra politike nga ana e opozitës dhe se ai nuk ka shkelur asnjë ligj.
Qeveria dhe opozita po shkëmbejnë akuza për afera korruptive me CEZ, nga privatizimi i operatorit të shpërndarjes së energjisë, puna e dobët gjatë 4 vjetëve, dështimi dhe prishja marrëveshjes dhe deri te futja e kompanive të ndërmjetme për të mbledhur faturat e papaguara.
Socialistët pohojnë se një hetim ndërkombëtar për cështje të brendshme do të ishte antikushtetuese, ndërsa juristët pohojnë se hetues të huaj mund të ndihmojnë grupin e hetuesve shqiptarë, madje qeveria ka kërkuar tashmë ndihmë në këtë formë nga qeveria amerikane.