Nga zjarri i mortajave të militantëve palestinezë në Rripin e Gazës u vra një fëmijë izraelit.
Zyrtarët izraelitë thonë se djali katër-vjeçar gjeti vdekjen nga një mortajë që ra pranë një kopshti në Izraelin jugor. Ata thanë se ai është fëmija i parë izraelit që vdes nga dhuna e cila filloi më 8 korrik.
Kryeministri izraelit Benjamin Netanyahu deklaroi se Hamasi do të "paguajë një çmim të lartë" për sulmin. Ambasadori amerikan në Izrael Dan Shapiro dënoi ashpër atë që ai e quajti "sulm i egër terrorist".
Disa orë para incidentit, Hamasi mori përgjegjësinë për rrëmbimin dhe vrasjen e tre të rinjve izraelitë në muajin qershor - incident që çoi në luftën e tanishme në Gazë.