Lidhje

Bie vlera e monedhës kineze


Kina ka lejuar rënien e vlerës së monedhës së saj për të dytën ditë rradhazi, një manovër e papritur që ka tronditur tregjet globale. Rënia e vlerës së Juanit po ashtu mund të shtojë tensionet mes Kinës dhe konkurentëve të saj tregtarë.

Vlera e juanit ra 1.6 përqind sot pas rënies afro 2 përqind të martën, që ishte më e madhja brenda një ditë në 10 vjet.

Banka qendrore e kinës, e cila kontrollon monedhën, e cilësoi manovrën si përpjekje e përkohëshme që ka synim ta bëjë monedhën kineze më të pëlqyeshme në treg.

Ndryshimi vjen pas rënies së eksporteve dhe trazirave në bursën e ekonomisë së dytë më të madhe në botë. Zhang Yuzhong është me Ministrinë e Tregtisë së Kinës.

“Situata aktuale nuk do të ketë ndikim të qartë në fushat e tregtisë dhe investimeve. Mendoj se rënia e vlerës së monedhës do të ketë efekt stimulues tek eksportet.”

Investitorët në Azi reaguan negativisht sot ndërsa çmimet e aksioneve ranë në bursat e Hong Kongut, Shangait dhe Tokjos.

Nga ana tjetër, Shtetet e Bashkura reaguan me kujdes lidhur me zhvlerësimin e juanit. Amerika prej kohësh e ka akuzuar Pekinin se po e mban të zhvlerësuar monedhën për t’u dhënë eksporteve të saj avantazhe të padrejta. Deklarata e Departamentit amerikan të Thesarit thotë se është shumë herët për të përcaktuar nëse lëvizja e Pekinit do të ketë ndikime. Fondi Monetar Ndërkombëtar u tregua më optimist duke thënë se zhvlerësimi duket një hap i mirëpritur.

XS
SM
MD
LG