Komisioni i Zgjedhjeve në Kroaci tha të hënën se me 99 për qind të votave të numëruara, Bashkimi Demokratik Kroat ((HDZ) ka fituar 59 vende në parlamentin 151vendësh të Kroacisë. Social-demokratët në pushtet kanë fituar 56 vende. Partia e ri e quajtur Most (Ura) fitoi 19 vende dhe do të jetë çelësi i formimit të qeverisë.
Zgjedhjet u mbajtën, në mes të vështirësive ekonomike dhe një rritjeje masive të migruesve që po shfrytëzojnë territorin e këtij vendi për të vazhduar drejt vendeve perëndimore të Evropës, kryesisht në Gjermani.
Që nga shtatori, në Kroaci kanë hyrë më shumë se 330 mijë migrues, nga Lindja e Mesme.
Konservatorët e drejtuar nga ish shefi i zbulimit Tomislav Karamarko, e kishin zhvilluar fushatën duke kritikuar ashpër qeverinë e qendrës së majtë të kryeministrit Zoran Milanoviç, për lejimin e qindra mijëra migruesve nga që të kalojnë lirshëm nëpër Kroaci gjatë muajve të fundit.