Lidhje

DASH reagon ndaj incidentit me dhunë të 27 shtatorit në veri të Kosovës


DASH reagon ndaj incidentit me dhunë të 27 shtatorit në veri të Kosovës
DASH reagon ndaj incidentit me dhunë të 27 shtatorit në veri të Kosovës

Departamenti amerikan i Shtetit reagon ndaj incidentit me dhunë të së martës në veri të Kosovës ku mbetën të plagosur paqeruajtës të NATO-s dhe protestues serbë. Në një deklaratë që bëri dje, Departamenti i Shtetit dënoi sulmin me dhunë të një turme serbësh kundër forcave të KFOR-it më 27 shtator.

Trupat e KFOR-it po ç’montonin një bllokim rruge dhe po ngrinin një pikë kontrolli automjetesh në një pikë të paautorizuar kalimi kufitar, kur u gjendën nën sulmin e serbëve, thuhet në deklaratën e Departamentit të Shtetit. Me keqardhje, vazhdon deklarata, nëntë anëtarë të KFOR-it u plagosën gjatë incidentit, i cili ndodhi ndërkohë që trupat po përmbushnin përgjegjësitë e tyre në bazë të Rezolutës 1244 të Këshillit të Sigurimit.

Departamenti amerikan i Shtetit thotë se po vazhdon të ndjekë nga afër zhvilliet në veri të Kosovës dhe u bën thirrje të gjitha palëve të ruajnë qetësinë, të shmangin aktet provokuese dhe retorikën që nxit dhunën, si dhe të lejojnë lirinë e lëvizjes.

Departamenti i Shtetit thekson se liria e lëvizjes së njerëzve dhe mallrave është në interesin më të mirë të Kosovës dhe Serbisë, dhe në përputhje me aspiratat e vendit për t’u anëtarësuar në Bashkimin Evropian. Bllokimet e rrugëve, barrikadat dhe dhuna, thuhet me tej në deklaratën e Departamentit të Shtetit, bëhen vetëm pengesë për normalitetin e jetës së përditëshme të banorëve të Kosovës dhe Serbisë, dhe pengojnë lirinë e tyre të lëvizijes.

Departamenti i Shtetit u bën thirrje qeverive të Kosovës dhe Serbisë të qendrojnë të angazhuara të procesin e dialogut të ndërmjetësuar nga Bashkimi Evropian, të inkurajojnë qetësinë dhe të gjejnë rrugën e marrëveshjes për përmirësimin e jetës së qytetarëve të të dy vendeve.

Ndërkaq, dje pas dite, ambasadori i Rusisë në Kombet e Bashkuara, Vitali Çurkin, kritikoi praninë e KFOR-it për prishjen e barikadës rrugore dhe ngritjen postbllokut në pikën e paautorizuar të kalimit, duke thënë se ajo bie ndesh me mandatin e forcës.

“Sekretari i Përgjithshëm i NATO-s e siguroi ministrin e Jashtëm të Rusisë, Sergei Lavror, se KFOR-i do t’i përmbahej thjesht statusit të tij neutral. Se çfarë dreqin bënte KFOR-i në atë bllokim rrugor, nuk mund ta kuptoj”.

Çurkin mbrojti përsëri tezën e Rusisë në mbështetje të Serbisë se shpallja e pavarësisë së Kosovës është e jashtëligjshme dhe se Shtetet e Bashkuara dhe vende të tjera evropiane që e kanë njohur atë janë përgjegjëse për këtë situatë të nderë në Kosovë.

Edhe Beogradi ka kritikuar praninë ndërkombëtarë si shkak për nxitjen e dhunës Sekretari shtetëror në ministrinë serbe për Kosovën, Oliver Ivanovic, tha se KFOR-i ka përdorur forcë të paarsyeshme mbi protestuesit serbë. Banorët serbë në Mitrovicë fajësojnë amerikanët që janë pjesë e KFOR-it për dhunën e të martës, si dhe ushtarakët gjermanë.

Por, zyrtarë të KFOR-it thanë se ishin grupe dhe individë serb që nxitën dhunën, ndërsa u zotuan se do të shfrytëzojë të gjitha mjetet e përcaktuara në mandatin e tyre për ruajtjen e një mjedisi të qetë dhe të sigurt për të gjithë. Dhuna është dënuar edhe nga Bashkimi Evropian, I cili ka shprehur mbështetje të plotë KFOR-it dhe EULEX-it në përpjekjet për vendosjen e qetësisë në veri. Dhuna u dënua edhe nga Kryeministri i Kosovës Hashim Thaçi, i cili e quajti të papranueshëm çdo sulm ndaj pranisë ndërkombëtare në Kosovë.

Që nga 16 qershori rrugët e veriut të Kosovës janë bllokuar nga barrikadat e vendosura nga serbët në shenjë pakënaqësie me praninë e policisë dhe doganierëve të Kosovës në atë zonë. Ata kërkojnë largimin e tyre nga vendkalimet kufitare, kërkesë që është hedhur poshtë edhe nga qeveria e Kosovës.

XS
SM
MD
LG