Lidhje

Trenat Eurostar ndërpriten për shkak të migruesve


.

.

Pesë trena që udhëtojnë nga Franca për Britani të Madhe u vouan apo u kthyen mbrapsht për shkak të krizës së migrimeve

Trenat Eurostar që udhëtojnë ndërmjet Britanisë së Madhe dhe Francës, ndaluan për disa orë gjatë natës për shkak të dyshimit se migruesit e paligjshëm kishin bllokuar binarët, në një nga zhvillimet e fundit në krizën e migruesve në Evropë.

Qindra pasagjerë u shfaqën të zemëruar pas vonesave të së martës mbrëma që përfshinë pesë trena që udhëtojnë nga Parisi për në Londër. Tre nga trenat përfunduan rrugëtimin e tyre, ndërsa dy të tjera u kthyen prapa. Pasagjerët u ankuan se energjia elektrike dhe ajri i kondicionuar ishin prerë gjatë kohës sa ata prisnin.

Trenat ndaluan në hyrje të Eurotunelit, pasi që zyrtarët dhanë alarmin se migruesit mund të kishin hyrë në tunel apo po udhëtonin në kulmet e trenave. Autoritetet nuk thanë nëse ka pasur të arrestuar.

Porti francez në Calais, ishte epiqendër e përpjekjeve të migruesve për të kaluar në Britani nëpërmjet Eurotunelit. Por, zyrtarët thanë se numri i njerëzve që po përpiqen ta kalojnë atë ka rënë në 100 deri 200 veta gjatë natës, për dallim nga dy mijë sa përpiqeshin brenda një nate gjatë muajit korrik.

Gjerat janë më keq ne kufijtë lindor të Evropës.

Të martën Organizata Ndërkombëtare për Migrim tha se më shumë se 350 mijë migrues kanë ndërmarrë rrugën e rrezikshme nëpërmjet Mesdheut gjatë këtij viti, duke ikur nga varfëria dhe trazirat në Lindjen e Mesme e në Afrikë dhe në kërkim të një jete më të mirë në Evropë.

Më shumë se 234 mijë veta kanë zbritur në brigjet e Greqisë, rreth 114 mijë në Itali dhe një numër më i vogël në Spanjë dhe në Maltë. Më shumë se dy mijë e 600 kanë humbur jetën më së shpeshti për shkak të mbytjes së anijeve të vjetra e të mbipopulluara të drejtuara nga trafikantët.

Të dhënat janë publikuar në një periudhë kur Evropa po vazhdon të përballet me rrjedhën më të madhe të migruesve që nga Lufta e Dytë Botërore.

Zëdhënësi i Agjencisë së Kombeve të Bashkuara për refugjatët, Babar Baloch, i tha Zërit të Amerikës se “të gjitha vendet kanë përgjegjësinë e tyre për t’u përballur me krizën”. Shume nga vendet megjithatë po kërkojnë bllokimin ose kufizimin e rrjedhës së migruesve.

Në Hungari, autoritetet mbyllën të martën për ta rihapur sërish stacionin kryesor të trenave në Budapest. Qindra migrues, kryesisht nga zonat e konflikteve në Lindjen e Mesme, u lanë jashtë stacionit derisa po përpiqeshin të vazhdonin rrugëtimin e tyre për në Austri ose Gjermani.

Hungaria është një nga portat kryesore të hyrjes së migruesve në Bashkimin Evropian me rreth 156 mijë veta gjatë këtij viti.

Muri me tela gjemborë në kufirin Hungari - Serbi

Muri me tela gjemborë në kufirin Hungari - Serbi

Budapesti është duke ngritur një mur të lartë me tela gjemborë në kufirin e saj jugor me Serbinë. Ministri i mbrojtjes Csaba Hende u tha ligjvënësve se 3 mijë e 500 ushtarë mund të dërgohen në kufi për t’u përballur krizën e migrimeve, por pa të drejtën e përdorimit të forcës vdekjeprurëse.

Qindra policë nxorën migruesit nga stacioni dhe bllokuan hyrjen e tyre të martën, pak pasi që nga altoparlantët iu bë thirrje të gjithë pasagjerëve që të evakuohen.

Nuk ka pasur njoftime për përleshje, ndryshe nga çfarë kishte ndodhur më herët gjatë ditës, kur qindra veta provuan të hipin në një tren që udhëtonte për në Vjenë, por u bllokuan nga policia.

Pasi që u nxorën nga stacioni, migruesit u mblodhën jashtë tij duke ngritur një kamp të improvizuar. Disa brohoritën “Liri, Liri” apo “Gjermani, Gjermani”, një nga vendet e synuara prej shumë syresh.

Autoritetet austriake thanë se gjithsej 3 mijë e 650 migrues arritën të hënën në Vjenë. Ky është numri më i madh i migruesve brenda një ditë gjatë këtij viti në valën tronditëse të njerëzve që po kërkojnë strehim në Bashkimin Evropian.

Sipas agjencisë së lajmeve Reuters, kur u pyetën përse e mbyllën stacionin dhe ndaluan migruesit, një zëdhënës i qeverisë hungareze tha se autoritetet po përpiqen të zbatojnë ligjet e BE-së.

Sipas ligjeve të BE-së, migruesit duhet të kërkojnë strehim në vendin e parë të hyrjes. Kësisoj Hungarisë teknikisht i është pamundësuar të lejojë migruesit që të shkojnë në Austri dhe Gjermani.

Zbatimi jo i plotë i rregullave ka bërë që shumë migrues të mbeten në situatë pa rrugëdalje, meqë shumë nuk kanë dokumente të nevojshme apo para për të blerë bileta treni.

Të martën, kancelarja gjermane Angela Merkel, u bëri thirrje vendeve evropiane që të përshpejtojnë një politike të përbashkët strehimi, që sipas saj, do të përfshijë edhe ngritjen e qendrave të regjistrimit të migruesve në zonat kalimtare.

Ndërsa tha që refugjatët e luftës dhe të përndjekurit duhet të vendosen në Evropë, kancelarja Merkel nënvizoi se ata që ikin për arsye ekonomike, duhet të kthehen në vendet e tyre.

Gjermania ka pranuar më shumë refugjatë sesa cdo vend tjetër evropiane me një numër të përgjithshëm që mund të arrij në 800 mijë deri në fund të vitit. Por, Sllovakia, Republika Ceke, Hungaria dhe Polonia, janë në mesin e vendeve kanë bllokuar planin e vendeve anëtare të BE-së për të pranuar një numër të caktuar refugjatësh.

Kryeministri sllovak Robert Fico, tha se vendi i tij “nuk do të pajtohet kurrë”, me kuotat e refugjatëve që duhet pranuar.

Ministri i jashtëm francez Laurent Fabius, akuzoi të shtunën vendet e Evropës Lindore, posaçërisht Hungarinë për politika skandaloze kundrejt migruesve që bien ndesh me vlerat e Bashkimit Evropian.

Sekretari hungarez i shtetit Levente Magyar, i tha agjencisë kombëtare të lajmeve se qeveria hedh poshtë akuzat e ministrit Fabius.

Vendet anëtarë të BE-së planifikojnë të zhvillojnë bisedime emergjente mbi çështjen e migrimeve më 14 shtator.

Trego komentet

XS
SM
MD
LG