Lidhje

Freedom House për gjendjen e demokracisë në Kosovë


Organizata nxorri raportin e përvitshëm për Vendet në Tranzicion

Rezultati për vlerësimin e demokracisë për Kosovën është keqësuar lehtë duke shkuar nga 5.18 në 5.25 me rënie në kategoritë e shoqërisë civile dhe korrupsionit.
Në raportin për Kosovën përmenden arritje si përfundimi i “pavarësisë së mbikqyrur” dhe dialogu me Serbinë të drejtuar nga Catherine Ashton. Në raport përmenden edhe hapat drejt integrimit në Bashkimin Evropian. Në kategorinë e qeverisjes qendrore, klasifikimi i Kosovës ka mbetur i pandryshuar në nivelin 5.75.

Freedom House thotë se megjithëse ka arsye për optimizëm të matur, institucionet në Kosovë mbeten të dobëta dhe u mungon përgjegjshmëria demokratike.

Edhe klasifikimi për procesin zgjedhor ka mbetur i pandryshuar në nivelin 5.00. Në raport thuhet se reformat zgjedhore të filluara pas zgjedhjeve problematike vitit 2010, kanë ngecur kryesisht për shkak të mosmarrëveshjeve politike. Bllokimi sipas organizatës, u keqësua nga mosmarrëveshja për mandatin e Presidentes Atifete Jahjaga.

Rezultati për shoqërinë civile pësoi keqësim nga 3.75 në 4.00, për shkak të problemeve me një ligj për mikrofinancë që në vend të mbështeste organizatat joqeveritare, i jepte mbështetje disa individëve, poltizimit të Universitetit të Prishtinës me emërimin e zëvendës Presidentit të Aleancës Kosova e Re si rektor. Po ashtu universitetet private u përballën me diskriminim në procesin e akreditimit, pasi kishin anëtarë të personelit që kundërshtonin politikat e qeverisë.

Lidhur me gjendjen e lirisë së medias, Freedom House përmend kundërshtimin ndaj neneve të debatueshme në Kodin e Ri Penal. Presioni i medias dhe shoqërisë civile, dhe dorëheqja e Ministrit të Drejtësisë, çoi në amendamente që i hiqnin nenet problematike. Në raport përmendet ligji për buxhetin e RTK-së që siguron 0.7 për qind të buxhetit të shtetit për transmetuesin publik, por që sipas organizatës nuk siguron funksionalitet afat gjatë. Qeveria vazhdoi vonimin e emërimeve për Komisionin për Pavarësinë e Medias dhe dhuna kundër gazetarëve vazhdoi, shpesh pa ndëshkim. Rezultati për median mbeti në nivelin 5.75.

Problemet me qeverisjen lokale vazhdojnë dhe faza finale e decentralizimit nuk u realizua në zonat me shumicë serbe për shkak të komplikimeve politike. Rezultati në këtë kategori mbeti në 4.75.

Pavarësisht nga reformat legjislative dhe rezultateve të qendrueshme të Gjykatës Kushtetuese, gjyqësori i Kosovës mbetet vetëm në letër i pavarur nga ekzekutivi. Rezultati për këtë kategori ka mbetur 5.50.

Akuzat për korrupsion, veçanërisht në procesin e privatizimit janë në rritje dhe autoritetet vazhdimisht kanë dështuar në vënien para përgjegjësisë për hapat e gabuar të polikës. Në raport përmendet vdekja e kreut të agjencisë së privatizimit, gjë që u cilësua vetëvrasje. Shteti ligjor dhe veçanërisht lufta kundër korrupsionit dhe krimit të organizuar mbeten ndër sfidat më madhore të Kosovës. BE-ja ka kritikuar zbatimin e strategjisë kundër korrupsionit. Rritja e korrupsionit, nuk ka sjellë si rezultat përpjekje më energjike në luftën kundër tij, prandaj vlerësimi për këtë dukuri ka rënë nga 5:75 në 6.00.

Sfidat që parashikon Freedom House për këtë vit për Kosovën është zbatimi i marrëveshjes me Serbinë, reforma zgjedhore para votimeve lokale në vjeshtë dhe debate për Privatizimin e PTK-së.


Vlerësimet e Freedom House për vitin 2012 dhe 2013:

Procesi elektoral 5.00 të dy vitet
Shoqëria Civile bie nga 3.75 në 2012 në 4.00 në 2013
Shtypi i Pavarur 5.75 të dy vitet
Qeverisja Qendrore 5.75 të dy vitet
Qeverisja Lokale 4.75 të dy vitet
Sistemi Gjyqësor dhe pavarësia e tij mbeten 5.50
Korrupsioni shënon rënie nga 5.75 në 2012 në 6.00 në 2013
Demokracia bie nga 5.18 në 2012 në 5.25 në 2013

Mendimi juaj

Trego komentet

XS
SM
MD
LG