Kancelarja gjermane Angela Merkel premtoi sot në Kongresin e Partisë së saj Kristiandemokrate, se do ta pakësojë ndjeshëm numrin e imigrantëve që hyjnë në Gjermani. “Kjo është në interesin e të gjithëve”, - tha zonja Merkel. Ajo tha se është në interesin e Gjermanisë, të Europës, por edhe të vetë refugjatëve, që të mos largohen nga shtëpitë e tyre.
Gjermania pret që këtë vit të hyjnë në vend më tepër se 1 milion refugjatë.
E përballur me mundësinë e një revolte brenda partisë, zonja Merkel po përdor një gjuhë më të ashpër për krizën e refugjatëve.
Ajo dënoi vendet e pasura që nuk kanë dhënë financimet e nevojshme për Agjencinë e Kombeve të Bashkuara për Refugjatët dhe për Programin Botëror të Ushqimit, duke e cilësuar mungesën e financimeve “të pafalshme” dhe “të papranueshme”.