Lidhje

Italia miraton shkurtime të ndjeshme buxhetore në përgjigje të problemit të borxhit

  • Zëri Amerikës

Italia miraton shkurtime të ndjeshme buxhetore në përgjigje të problemit të borxhit

Italia miraton shkurtime të ndjeshme buxhetore në përgjigje të problemit të borxhit

Italia po përpiqet t’i shpëtojë fatit të Greqisë, Irlandës e Portugalisë, duke miratuar shkurtime të ndjeshme buxhetore në përgjigje të problemit të borxhit. Evropa ka sinjalizuar se një falimentim financiar i Italisë do të ishte kërcënim madhor për organizatën, pasi ky vend ka ekonominë numër 3 në Bashkim. Parlamenti shpejtoi të miratonte masat shtrënguese të parashtruara nga kryeministri Berluskoni, ndërkohë që popullata ka reaguar me protesta ndaj këtyre planeve:

Disa qindra punonjës të sektorit publik dhe sektoreve të tjera u mblodhën para selisë së parlamentit në Romë ndërkohë që Dhoma e Ulët e parlamentit po diskutonte një paketë me shkurtime buxhetore me vlerë 99 miliardë dollarë.

Diskutimi i parapriu hedhjes në votë të këtyre masave të domosdoshme për të parandaluar një krizë buxhetore në ekonominë numër tre të Evropës.

Kryeministri Silvio Berluskoni i kishte futur masat e propozuara në procesin e përshpejtuar të miratimit, pas rënies së tregjeve si rezultat i shqetësimeve për stabilitetin financiar të Italisë.

Paketa e shkurtimeve u miratua dje në Senat, ku gjeti mbështetje nga deputetët si e domosdoshme për të mbrojtur vendin nga kriza. Paolo Bareta është deputet i Partisë Demokrate:

“Duhet të vepronim. Ekspozimi i vendit tonë ndaj tregjeve ndërkombëtare ka paraqitur rrezik prej kohësh, por ajo që pamë javën e kaluar dhe në fillim të kësaj jave ishte vërtetë një rënie e madhe dhe e rrezikshme”.

Por masat janë pritur me protesta nga segmentë të ndryshme të popullatës. Luçia Lombardo është drejtuese sindikaliste:

“Ligji i buxhetit godet ata që paguajnë taksa dhe në Itali 80 për qind e taksave paguhen nga punëtorët dhe pensionistët. Pikërisht këto sektorë do të goditen nga rritjet e taksave, ndërkohë që rritja e TVSH-së do të ndikojë tek çmimet e makaronave, bukës, pra do të ulet fuqia blerëse”.

Shqetësimet për stabilitetin e tregjeve u shtuan këtë javë. Investitorët tremben se një skenar i ngjashëm me Greqinë, Irlandën dhe Portugalinë mund të kapë edhe Italinë, e cila karakterizohet nga borxhe të larta dhe rritje e ulët ekonomike.

XS
SM
MD
LG