Zoti Moore u takua me presidentin e Republikës, Bujar Nishani, me të cilin bisedoi mbi pesëvjetorin e anëtarësimit të Shqipërisë në NATO. Presidenti Nishani vlerësoi se kjo arritje historike për Shqipërinë u bë e mundur edhe nga mbështetja amerikane. Sipas njoftimit zyrtar, zoti Nishani shprehu bindjen se Shqipëria po e përligj në këto pesë vite besimin dhe pritshmëritë e aleatëve, duke dhënë ndihmesën e vet për sigurinë dhe paqen në rajon dhe në botë.
Gjatë takimit u diskutua edhe mbi ecurinë e integrimit në BE, arritjet e deritashme në këtë proces dhe mbështetja e partnerëve europianë dhe Shteteve të Bashkuara dhe u shpreh besimi që Shqipëria do të marrë statusin e vendit kandidat në qershor. Presidenti Nishani dhe diplomati amerikan i vlerësuan si sfida të rëndësishme luftën kundër korrupsionit, reformën në drejtësi dhe reformën administrative territoriale.
Drejtori për çështje të Europës qendrore dhe jugore në Departamentin amerikan të Shtetit, Jonathan Moore u takua më pas me ministren e mbrojtjes Mimi Kodheli, ku vend kryesor në bisedë zuri pesëvjetori i anëtarësimit të Shqipërisë në NATO dhe angazhimet në misionet paqeruajtëse në kuadër të Aleancës. Zoti Moore zhvilloi një bisedë edhe me kryetarin e Partisë Demokratike të opozitës, Lulzim Basha. Sipas zyrës së shtypit, zoti Basha përmendi dy shqetësime kryesore të opozitës: moszbatimin nga qeveria të vendimeve të gjykatave dhe mosrespektimin e mandatit të institucioneve të pavarura.
Kjo është pjesë e vizitave të rregullta e të vazhdueshme, që zoti Moore zhvillon në Shqipëri dhe në rajon, ndonëse këtë radhë vizita e tij përkoi me një acarrim të marrëdhënieve mes partive kryesore politike. Përkrah politikanëve të njohur shqiptarë nga Shqipëria, Kosova dhe Maqedonia, në ditën e dytë ai pritet të flasë në një konferencë ndërkombëtare për bashkëpunim atlantik për paqen dhe sigurinë në Ballkan, si dhe mbi integrimin e Shqipërisë në BE dhe në NATO. Pas takimeve në kryeqytet me kryetarin e parlamentit Ilir Meta dhe kryeministrin Edi Rama, zoti Moore do të vizitojë edhe Kosovën.