Uashingtoni pranoi të hënën se bëri gabim që nuk dërgoi një nga zyrtarët më të lartë, për të marrë pjesë në marshimin e solidaritetit në Francë, pas sulmeve terroriste të javës së kaluar.
Zëdhënësi i Shtëpisë së Bardhë Josh Earnest nuk e mbrojti më vendimin që Shtetet e Bashkuara të përfaqësoheshin nga ambasadorja amerikane në Francë Jane Hartley dhe nga zyrtarja më e lartë e Departamentit të Shtetit për Evropën, Victoria Nuland në marshimin e solidaritetit, ku dhjetra udhëheqës botërorë ishin në krah të presidentit francez Francois Hollande.
Sekretari amerikan i Shtetit John Kerry i cili ndodhet në një udhëtim të planifikuar më parë në Indi dhe Pakistan do të shkojë në Francë të enjten.
