Mbreti i ri i Arabisë Saudite, Salman, u zotua se do të vazhdojë politikat e Mbretit Abdullah, i cili u varros sot në kryeqytetin e vendit Riad.
Arabia Saudite nuk humbi kohë për të emëruar mbretin e ri dhe princin e ri të kurorës, për të siguruar një tranzicion të qetë dhe për të shuar shqetësimet rreth një paqëndrueshmërie të mundshme të dinastisë.
Mbreti Abdullah, i cili vdiq sot herët në mëngjes, u vu të prehej në një varr pa shenjë, pas një ceremonie të thjeshtë ku morën pjesë krerët më të lartë të botës arabe dhe myslimane.
Abdullah u ngjit zyrtarisht në fron në vitin 2006. Por faktikisht ai kishte qenë në krye të mbretërisë që prej vitit 1995, kur paraardhësi i tij dhe vëllai nga i ati, Mbreti Fuad, pësoi hemoragji që e la fizikisht të paaftë.
Abdullah mendohet të ketë lindur në vitin 1924. Kur ai arriti moshën e pjekurisë, në shkretëtirën saudite u zbulua naftë dhe vendi u shndërrua gradualisht në eksportuesin kryesor të naftës në botë, duke i sjellë pasuri të mëdha familjes mbretërore.
Pasi mori frenat e pushtetit, ai ndërmori hapa të papara për të modernizuar mbretërinë konservatore.
Grave iu dha një zë në politikë dhe, për herë të parë këtë vit, ato u lejuan të votojnë në zgjedhjet lokale.
Ai themeloi gjithashtu një universitet të stilit perëndimor ku studentët e të dyja gjinive mësonin në klasa të përbashkëta.
Muzika, më parë e ndaluar, filloi të dëgjohej në televizionin dhe radion saudite.
Reagimet nga udhëheqësit botërorë nuk kanë munguar. Presidenti amerikan Barack Obama ofroi ngushëllimet e tij personale dhe të popullit amerikan ndaj popullit saudit dhe familjes mbretërore.
Ish-Presidenti izraelit Shimon Peres tha se mbreti saudit ishte një udhëheqës i vendosur:
"E admiroja pozitën e tij dhe mendoj se kjo ka ndikuar tek shumë njerëz kudo në botë. Shpresoj se trashëgimia e tij do të mbetet si një kujtim i mirë për popullin e tij dhe si faktor i rëndësishëm për të sjellë paqe në Lindjen e Mesme.''
Shefja e Fondit Monetar Ndërkombëtar, Christine Lagarde, tha se ajo admironte reformat e Mbretit Abdullah, përtej reformave të tij ekonomike:
"Shumë shpesh Arabia Saudite është portretizuar si një vend ku gratë nuk luajnë të njëjtin rol, por madhëria e tij ishte i vendosur ta ndryshonte gradualisht gjendjen."
Pavarësisht reformave në vend dhe politikave të moderuara ndërkombëtare, grupet e të drejtave të njeriut vazhdojnë ta kritikojnë Arabinë Saudite. Ata thonë se grave atje ende u mohohen shumë nga të drejtat themelore.
Disidenca nuk tolerohet, fjala e lirë mbytet dhe krimi ende ndërshkohet me dënime të tilla ekstreme si prerje koke.
Vëllai nga i ati i mbretit Abdullah, Princi Salman, është tani udhëheqësi i ri i Arabisë Saudite. Në një fjalim drejtuar vendit, ai u zotua se do ta mbajë Kuranin në qendër të sistemit ligjor dhe do të vazhdojë politikat e paraardhësit të tij.
Zyrtarët e Shtëpisë së Bardhë thanë se nënpresidenti Joe Biden do të kryesojë një delegacion presidencial për në Arabinë Saudite për nderimet e rastit si dhe për t'i ofruar ngushëllime familjes mbretërore dhe vendit.