Lidhje

Kolorado: 12 të vrarë në një kinema


Një njeri i maskuar hodhi një bombë me gaz lotsjellës dhe filloi të qëllonte pa dallim mbi shikuesit

Policia në shtetin e Kolorados tha se 12 persona u qëlluan për vdekje dhe të paktën 38 u plagosën nga të shtënat brenda një kinemaje në periferi të Denverit. Pak më vonë policia arrestoi të dyshuarin James Holmes, një 24 vjeçar amerikan i cili kohët e fundit ndërpreu studimet në shkollën e mjekësisë. Polica tha se sulmi nuk kishte lidhje me ndonjë grup terrorist.

Ngjarja ndodhi sot herët në mëngjes në një kinema të qytetit Aurora kur sapo kishte filluar premiera e filmit me Batman "The Dark Knight Rises”. Sipas zyrtarëve, një njeri i maskuar u ngrit në këmbë në pjesën e përparme të kinemasë, u kthye nga turma, hodhi një bombë me gaz lotsjellës dhe filloi të qëllonte pa dallim. Sipas dëshmitarëve, ai qëlloi edhe një të mitur nga një distancë e vogël.

Policia thotë se pak më vonë e arrestoi personin në fjalë në parkingun jashtë kinemasë. Policia se personi, i cili është në të njëzetat, kishte një pushkë dhe një pistoletë. Shefi i Policisë së Aurorës, Daniel Oates tha në një konferencë për shtyp se vetëm një person ishte i përfshirë në ngjarje, ndryshe nga njoftimet e para ku thuhej se ai mund të ketë patur një bashkëpunëtor.

Sipas shefit të policisë, personi i dyshuar u tha hetuesve se kishte eksplozivë të shumtë në banesën e tij. Disa orë pas ngjarjes, rrjetet televizive treguan pamje të policisë duke përdorur vinça në përpjekje për të hyrë në banesë.

"I dyshuari i cili është në arrest, bëri deklarata rreth eksplozivëve të shumta që mund të kishte në banesë. Ne kemi evakuuar banorët e pallatit me supozimin e se aty mund të ketë lëndë shpërthyese. Po ashtu edhe në parkimin e pallatit, të cilin e kemi bllokuar dhe kemi sjellë ekipet për kërkim bombash.”

Në një deklaratë nga Shtëpia e Bardhë, Presidenti Barak Obama tha se ai dhe gruaja e tij Michelle janë "të tronditur dhe të pikëlluar" nga ngjarja "e tmerrshme dhe tragjike". Shtëpia e Bardhë thotë se zoti Obama u informua nga Këshilltari për Sigurinë Kombëtare John Brennan.

Presidenti tha se "autoritetet janë të vendosura për të sjellë para drejtësisë cilindo që është përgjegjës ", dhe po kujdesen për të plagosurit.

Kandidati republikan për presidenci, Mitt Romney, tha se ai dhe gruaja e tij Ann janë "thellësisht të pikëlluar" nga ngjarja, të cilën ai e quajti "dhunë e pakuptimtë."

Trego komentet

XS
SM
MD
LG