Një delegacion anëtarësh të Kongresit të Shteteve të Bashkuara të Amerikës, të drejtuar nga kryetari Bob Goodlatte, po viziton Tiranën për të diskutuar me drejtuesit politikë dhe shtetërorë zhvillimet e fundit politike.
Në takimin me Presidentin e Republikës, Bujar Nishani, sipas njoftimit nga presidenca, ata shkëmbyen mendime e pikëpamje mbi situatën politike, zgjedhjet e ardhshme parlamentare, ecurinë e reformës në drejtësi, rëndësinë e shtetit ligjor, shqetësimin për dukurinë e kanabisit dhe trafikut të drogës, krimit të organizuar si dhe rreth buxhetit financiar për shpenzime ushtarake dhe mbrojtjen, duke pasur parasysh që Shqipëria është vend anëtar i NATO-s dhe aleat besnik e i ngushtë i Shteteve të Bashkuara të Amerikës.
Në këtë takim, sipas njoftimeve, u vlerësua edhe roli institucional e përkushtimi i Presidentit Nishani në ndërmjetësimin e dialogut mes palëve politike në vend.
Delegacioni i kongresmenëve pritet të takohen edhe me drejtues politikë e shtetërorë të Shqipërisë.
Facebook Forum