Në Kosovë, lëvizja Vetëvendosje paralajmëroi se do të kërkojë nga Gjykata Kushtetuese vlerësimin nëse fletëvotimet për zgjedhjet komunale të tre nëntorit janë në pajtim me Kushtetutën e Kosovës.
Kjo lëvizje kundërshton vendimin e Komisionit Qendror të Zgjedhjeve që në fletëvotime të jetë vetëm logoja e këtij komisioni por jo edhe shenjat e shtetësisë së Kosovës, një vendim për pasoi kërkesat e Beogradit që zgjedhjet të jenë të paanshme ndaj statusit të Kosovës.
Vetëvendosje beson se heqja e stemës së Republikës së Kosovës nga fletëvotimet është në kundërshtim me Kushtetutën e vendit.
Mbi 100 subjekte politike janë regjistruar për të marrë pjesë në zgjedhjet e tre nëntorit dhe në mesin e tyre janë 18 subjekte politike nga radhët e komunitetit serb.
Pjesëmarrja e serbëve të komunave veriore të Kosovës në zgjedhjet komunale, është pjesë e marrëveshjes së 19 prillit e arritur ndërmjet kryeministrave të Kosovës dhe Serbisë, Hashim Thaçi e Ivica Daçiç. Ata do të takohen sërish të dielën më 8 shtator në Bruksel për të diskutuar veç tjerash edhe procesin e votimeve, pas të cilit do të krijohet bashkësia e komunave serbe që sipas marrëveshjes do të ketë një shkallë të gjerë autonomie.