Në Kosovë, partitë politike pohojnë se nuk kanë ndryshuar qëndrimet e tyre që kanë cuar në një bllokadë politike e cila e ka lënë vendin pa institucione të reja që nga tetë qershori. Partia Demokratike ngul këmbë se pa të nuk mund të ketë institucione, pavarësisht që nuk i ka votat e mjaftueshme për të ngritur institucionet. Ndërkaq, koalicioni i krijuar nga Lidhja Demokratike, Aleanca për Ardhmërinë e Kosovës, Nisma për Kosovën dhe lëvizja Vetëvendosje pohon se i ka votat e mjaftueshme për ta lënë Partinë Demokratike në opozitë. Të dyja palët ndërkaq janë hedhur në diskutime të brendshme për tejkalimin e krizës politike.