Autoritetet holandeze bënë të ditur dje se gjykata e Posaçme për krimet e luftës në Kosovë do të krijohet në Hagë. Gjykata e cila do të merret me akuzat për krime gjatë viteve 1999 – 2000 të ngritura ndaj pjesëtareve të Ushtrisë Çlirimtare të Kosovës, do të financohet nga Bashkimi Evropian dhe do të veprojë në përputhje me ligjet e Kosovës. Autoritetet në Kosovë kanë shprehur gatishmërinë për të përmbushur të gjitha obligimet që dalin për themelimin e kësaj gjykate. Ndërsa autoritetet në Beograd kanë bërë të ditur se do ta ndihmojnë këtë gjykatë për zbardhjen e të gjitha krimeve që kanë ndodhur ndaj serbëve në Kosovë.
