Lidhje

Kosovë, dënohet kërcënimi kundër publicistit Veton Surroi


Kosovë, dënohet kërcënimi kundër publicistit Veton Surroi

Kosovë, dënohet kërcënimi kundër publicistit Veton Surroi

Në Kosovë, Ambasadori amerikan, Christopher Dell dënoi mbrëmë një mbishkrim kundër publicistit Veton Surroi dhe motrës së tij Flaka Surroi që drejton kompaninë mediale Koha.

Në mbishkrimin e vënë në rrugën ku ndodhet apartamenti i familjes Surroi, thuhej “Rruga e UDB-së – Flaka dhe Veton Surroi”, duke aluduar në Shërbimin e Dikurshëm Sekret serb.

Duke e dënuar këtë mbishkrim, ambasadori amerikan ka theksuar se pjesëtarët e familjes Surroi janë miq të vjetër të Shteteve të Bashkuara, dhe ç’është më e rëndësishme, ata janë patriotë të vërtetë të Kosovës. Shtetet e Bashkuara e kanë mirëpritur dhe mbështetur lirinë e shprehjes për një kohë të gjatë pasi ajo është themel i çdo demokracie. Gjuha kërcënuese që ka për qëllim të frikësojë, apo të nxisë dhunë ndaj një individi apo kundërshtari politik, është e papranueshme, thuhet në një deklaratë të ambasadorit Dell. Tabela e vendosur sot në rrugën “Rexhep Luci”, e cila sulmon Surrojtë, është një akt prej frikacakësh dhe në kundërshtim me vlerat demokratike të një Kosove të pavarur, thuhet në reagimin e ambasadorit amerikan në Prishtinë.

Ky veprim i kryer nga persona ende të panjohur është dënuar edhe nga udhëheqës institucionesh dhe drejtues të shoqatave të gazetarëve. Kryeministri i Kosovës Hashim Thaçi, e ka cilësuar këtë veprim si një akt të ulët dhe sulm ndaj vlerave të demokracisë së vendit. Institucionet e Kosovës po punojnë me përkushtim për tolerancën, mirëkuptimin dhe shprehjen e lirë. Prandaj, veprime të tilla janë të dëmshme për shoqërinë dhe shtetin e Kosovës, ka theksuar kryeministri Thaçi.

Ngjarja është dënuar nga Shoqata e Gazetarëve Profesionistë të Kosovës, e cila vlerëson se ajo synon të degradojë dy figura të shquara të gazetarisë dhe publicistikës së Kosovës. Ndërsa Unioni i Gazetarëve të Kosovës e sheh mbishkrimin si një mënyrë jo të mirë të shprehjes së pakënaqësisë ndaj personaliteteve të mediumeve në Kosovë, ndërsa u bën thirrje autoriteteve të Kosovës, që ta zbardhin ketë akt dhe të marrin masa sa më të shpejta ndaj autorëve të tij.

XS
SM
MD
LG