Në Kosovë, Partia Demokratike tha se është e gatshme të bisedojë me forcat tjera politike për zgjidhjen e ngërçit institucional në vend, por nuk do të heq dorë nga e drejta e saj për të zgjedhur kryetarin e Parlamentit, ndonëse një ditë më parë ajo dështoi të sigurojë votat për një gjë të tillë. Forcat tjera politike shqiptare thonë se seanca e djeshme e parlamentit të Kosovës dëshmoi qartazi se ato paraqesin shumicën parlamentare që mund të formojë institucionet e reja. Shpresat për tejkalimin e situatës në të cilën ndodhet vendi që nga zgjedhjet parlamentare të tetë qershorit tashmë janë vënë tek dialogu politik që mund të lehtësohet nga presidentja e Kosovës.
