Lidhje

Ahmeti: Nuk do të tolerojmë paligjshmërinë


Kryetari i ri i Prishtinës, Shpend Ahmeti i tha Zërit të Amerikës se punonjësit e administratës së kryeqytetit nuk duhet të ketë frikë nga pushteti i lëvizjes Vetëvendosje

Kryetari i ri i Prishtinës Shpend Ahmeti tha në një intervistë për Zërin e Amerikës se nuk to të tolerojë paligjshmërinë në administratën e kryeqytetit, por askush nuk duhet të ketë frikë nga pushteti i lëvizjes Vetëvendosje. Në intervistën dhënë korrespondentit tonë në Prishtinë, Besim Abazi, ai tha se lëvizja Vetëvendosje po profilizohet si parti e qendrës së majtë, ngjashëm më demokratët në Shtetet e Bashkuara dhe laburistët në Britaninë e Madhe.

Zëri i Amerikës: Zoti Ahmeti vitit 2013 po përmbyllet me ndërtimin e institucioneve të reja në komunat që sapo dolën nga zgjedhjet lokale dhe komuna e Prishtinës është një prej atyre që kanë shënuar ndryshim në gjeografinë politike të vendit. Ju sapo keni marrë edhe postin e kryetarit të Prishtinës. Cilat janë veprimet tuaja të para?
Intervistë me z. Shpend Ahmeti
please wait

No media source currently available

0:00 0:08:19 0:00

Shpend Ahmeti: Po që në fillim e prezantojmë ekipin qeverisës, të gjitha drejtoritë dhe në disa prej tyre e kemi një gjendje mjaft të rëndë dhe do të kemi edhe punë të tjera. Pra këto janë veprimet e para që para vitit të ri të instalojmë qeverisjen e re dhe të njihemi sa më shumë me administratën dhe të fillojmë punët ashtu sic i kemi paracaktuar për të gjitha ato zotime të cilat i kemi thënë, duhet të fillojmë punën që në ditët e para. Na presin shumë sfida. Unë e them që do të jetë interesante intervista në fund të vitit 2014 që të shohim, në të vërtetë të vlerësojmë, sepse ndryshimi është bërë, hapi i parë është bërë, por ndryshimi i vërtetë na pret gjatë vitit 2014.

Zëri i Amerikës: Në dritën e zhvillimeve në Prishtinë, si do t’i vlerësonit në përgjithësi zgjedhjet lokale në Kosovës që sapo përfunduan?

Shpend Ahmeti: Ka qenë në nivelin teknik, në aspektin teknik, një përmirësim i dukshëm nga zgjedhjet e vitit 2010. Si duket këtu ka luajtur rol posaçërisht një angazhim më i madh dhe ne si subjekt jemi angazhuar shumë në mbrojtjen e votës, por kanë qenë edhe kërcënimet e ambasadorëve të ndryshëm të cilët kanë thënë se nuk do të tolerohen më vjedhjet e tilla. Edhe pse më duhet të them se tentime ka pasur, por në këtë drejtim kisha me thënë që është një përmirësim i madh. Sa i përket aspektit politik dhe lëvizjes Vetëvendosje, ne kemi shënuar një fitore të mirë në kryeqytet, por jo edhe aq rezultat të kënaqshëm në komunat e tjera. Si duket, diskursi ynë politik për temat nacionale ka bërë që me shumicën e temave lokale në komunat tjera të mos depërtojmë me alternativën tonë qeverisëse, por prap se prap e quajmë me disa aspekte për Prishtinën shumë pozitivisht, por në disa aspekte nuk jemi të kënaqur me rezultatet në komunat tjera.

Zëri i Amerikës: A mund të presim një ndryshim sa i përket diskursit nacional të lëvizjes Vetëvendosje, e kam fjalën posaçërisht kur bëhet fjalë për përballjen me çështje lokale siç është pushteti komunal?

Shpend Ahmeti: Nuk pres ndonjë ndryshim posaçërisht duke marrë parasysh përkeqësimin e gjendjes për ato temat për të cilat kemi folur. Kur ne kemi thënë gjatë vitit se dialogu (me Serbinë) do të rrezikojë dhe defunksionalizojë Kosovën, të gjithë na thoshin se po i bëjmë gjerat më të mëdha se sa që janë, ndërsa sot i kemi nëntë komuna që deklarojnë se nuk e njohin shtetin e Kosovës, Serbia e merre datën e bisedimeve (me BE-në) dhjetë ditë pas gjetjes së varrezës masive në Rashkë, pa kërkuar asnjë falje...Këto janë gjërat që ne i kemi folur tërë kohën. Dhe tash nuk duam të themi se “e kemi pasur mirë” sepse nuk gjejmë ndonjë satisfaksion në faktin se doli siç thamë ne, por na pret një punë më e vështirë në kthimin e funksionalitetit të shtetit tonë. Prandaj, na presin tema të njëjta në nivelin nacional, ndërsa mua personalisht dhe ekipin tonë në Prishtinë na pret ballafaqimi me çështjen e ujit, çerdheve, shkollat publike dhe është ndoshta edhe një periudhë interesante që të shohin njerëzit edhe lëvizjen Vetëvendosje në qeverisje, sepse kemi ndryshuar shumë nga subjektet politike edhe në diskursin tonë edhe në qëndrimet tona politike dhe po ashtu po shihet menjëherë se standardin do të na e mbajnë shumë më lartë sesa subjekteve tjera.

Zëri i Amerikës: Ju keni kundërshtuar bisedimet me Serbinë dhe vazhdoni t’i kundërshtoni ato, por ato për herë të parë përfshirjen në zgjedhje edhe të komunave me shumicë serbe në veri. A nuk është ky një hap drejt integrimit të tyre siç thonë mbështetësit e tyre?

Shpend Ahmeti: Po ju e dini se zgjedhje në ato komuna ka pasur edhe më herët të organizuara nga Serbia. Nuk ka qenë ideja vetëm të organizohen zgjedhjet dhe të themi se kanë marrë pjesë qytetarët, por të organizohet dhe të funksionalizohet shteti ynë. Në qoftë se ne me qëllim të integrimit realisht e kemi ndarë Kosovën, nuk mendoj se kemi qenë të suksesshëm. Po them nuk kemi qenë sepse edhe ne si Vetëvendosje nëse nuk kemi mundur t’i parandalojmë disa gjëra edhe në i bartim një pjesë të përgjegjësisë. Por, tash ka absurditete të tilla që në Evropë nuk do të pranoheshin kurrë, që për shembull unë si shqiptar, nuk mund të jem udhëheqës i policisë në ato komuna vetëm pse unë kam lind si shqiptar. Nuk ka asnjë kriter tjetër. Këto janë kisha me thënë, zgjidhje shumë më diskriminuese dhe po shkojmë, ndoshta nuk quhet “Republika Srpska” sepse njerëzit thonë nuk është e njëjtë, por defunksionalizimi i shtetit është me të vërtetë diçka që duhet të na brengosë dhe nuk po mendoj se po integrohet shteti ynë.

Zëri i Amerikës: Por a nuk është kjo pasqyrim i gjendjes reale në veri, kur flasim ta zëmë sic thatë angazhimin në polici dhe policia, gjykatat dhe institucionet tjera a nuk janë realisht pasqyrim i përbërjes etnike në çdo pjesë të Kosovës?

Shpend Ahmeti: Por, duhet ta potencojmë se atë gjendje reale e kemi krijuar bashkë dhe e kemi toleruar bashkë. Kur themi ne se kjo gjendje është krijuar, po e bëjmë një ashtu “Self fulfilling prophecy”, që themi nuk bëhet ndryshe dhe pastaj veprojmë sikurse nuk mund të bëhet ndryshe. Integrimi real do të ndodhë vetëm kur të kemi integrim socio-ekonomik. Domethënë që të kemi një zhvillim ekonomik dhe të kemi njerëz që punojnë bashkë edhe nëpër fabrika dhe shkojnë bashkë edhe në universitete. Ai është integrimi i vërtetë. Jo ky integrim institucional që na thotë se duhet të kemi kaq njerëz në qeveri që janë të një nacionaliteti. Për mua, integrimi real do të ndodhte kur nuk do të ketë më rëndësi se a quhem unë Shpend apo kam emër serb, por është me rëndësi se a kam vend pune a kam cilësi të jetës dhe a po funksionin shteti. Ky është integrimi që ne duhet të synojmë. Ai nuk vjen brenda natës. Zgjidhje brenda natës nuk ka. Megjithatë, janë disa pika në të cilat duhet të veprohet në mënyrë që të ketë edhe sundim të ligjit gjithkah, por edhe kushte të jetës më të mirë.

Zëri i Amerikës: E megjithatë angazhimi në bisedimet me Serbinë, kryeministrit të Kosovës që ju aq shumë e keni kritikuar si lëvizje Vetëvendosje i solli edhe propozimin për çmimin Nobel. Si e shihni këtë propozim zoti Ahmeti?

Shpend Ahmeti: Po, tash nuk dua që unë të diskutoj, mendoj që komisioni i Nobelit do të vlerësojë shumë më mirë. Por, mendoj se më së shumti nga këto bisedime kanë përfituar tre persona. Jo populli. Nuk ka fituar as populli i Kosovës, as populli i Serbisë, e besa as Bashkimi Evropian nuk ka përfituar aq shumë. Këtu kanë përfituar kryeministri i Kosovës, i cili ka gjetur derë të hapur vetëm përmes dialogut në Bruksel. Ka përfituar (Ivica) Daçiçi, i cili po rehabilitohet politikisht nga periudha e (Slobodan) Millosheviçit vetëm përmes dialogut dhe ka përfituar Catherine Ashton, e cila dëshiron ta ndërtojë një karrierë të ndërmjetësuesit përmes suksesit të dialogut dhe i mbylle sytë edhe kundrejt padrejtësive që po ndodhin. Prandaj, le ta vlerësojë komisioni i Nobelit. Unë nuk jam në pozicion të vlerësojë kështu apo ashtu, por paqja nuk është arritur me këtë dialog. Besa, mosbesimi në mes të shqiptarëve dhe serbëve është në nivelin më të lartë që kamë parë ndonjëherë pas luftës.

Zëri i Amerikës: Ju jeni edhe nënkryetar i lëvizjes Vetëvendosje, që është pjesë e rëndësishme e Parlamentit ku aktualisht po diskutohet edhe për reformën zgjedhore pa të cilën nuk mund të ketë zgjedhje të përgjithshme. Si e shihni këtë reformë?

Shpend Ahmeti: Së pari, këtu dallojmë edhe nga subjektet tjera politike, sepse unë me marrjen e postit të kryetarit nuk jam më në kryesinë e lëvizjes Vetëvendosje, sepse e statuti jonë e ndalon që të mbajmë pozita edhe përfaqësuese edhe pozitë të ekzekutivit. Dhe e dytë është që sa i përket reformës zgjedhore, ne nuk e kemi konsideruar asnjëherë se problemi ka qenë tek ligji. Domethënë, nuk është vjedhë në zgjedhje pse ne e kemi një zonë (zgjedhore) apo pse nuk e kemi vendosë se cilat janë pragjet zgjedhore. Ne kemi pasur probleme me administrimin e zgjedhjeve. Në ditën e zgjedhjeve kemi pasur një, kisha me thënë, katastrofë administrative në vitin 2010, prandaj mendonim se reforma duhet të fokusohet në administrimin e zgjedhjeve e jo në reformën që e ndryshon ligjin këtu apo aty, sepse edhe atëherë, nuk ka qenë problem ligji. Pra, më shumë është kamufluar se po i hyjmë një reformë sepse kemi pasur vjedhje dhe tash duhet të kemi një reformë zgjedhore sesa që ta përmirësojmë procesin. Unë mendoj se BE, SHBA, duhet ta mbajnë standardin e lartë dhe t’u thonë të gjitha politike: edhe njëherë vjedhje të tilla masive në zgjedhje nuk do të tolerohen dhe nuk do të pranohen. Po thanë ata, ne pastaj angazhohemi shumë më shumë në administrimin e zgjedhjeve dhe do të jemi në gjendje ta mbrojmë votën sic e bëmë më tre nëntor dhe një dhjetor.

Zëri i Amerikës: Zoti Ahmeti ju jeni parë si një personalitet më i moderuar në kuadër të lëvizjes Vetëvendosje, madje shumë vëzhgues thonë se mbase zoti Ahmeti mund të ndikojë edhe në njëfarë reformimi të brendshëm të lëvizjes, përfshirë edhe gjuhën politike. Si mendoni ju...?

Shpend Ahmeti: Nuk mendoj se gjuha jonë ka qenë problemi apo arsyeja pse kemi fituar apo kemi humbur në disa komuna. Kjo do të mbetet të shihet edhe në zgjedhjet nacionale. Ne në lëvizjen Vetëvendosje na bashkon një qëllim. E ajo është që të kemi një shtet zhvillimor, një shtet të drejtë dhe një shtet social. Dhe ne jemi fytyrat e ndryshme të një qëllimi. Natyrisht, as binjakët nuk mund të jenë të njëjtë. Prandaj, që thonë po Shpendi është më ndryshe apo Visari, por është e vërtetë se nuk jemi të njëjtë edhe me fjali edhe me dukje, por jemi fytyra të ndryshme të të njëjtit qëllim dhe synim. Ne gjithmonë reflektojmë edhe mbi rezultatet e mira edhe mbi rezultat e këqija, po parimet nuk i ndërrojmë. Nuk devijojmë nga ato parimet që ne i konsiderojmë si kyçe. Brenda tyre pastaj ka hapësirë për diskutim të shumtë edhe për politika. Por, po mendoj se tash me një alternativë të nivelit qendror që e kemi, e kemi publikuar programin në gusht, po profilizohemi ngadalë si një subjekt politik i qendrës së majtë, social demokratik, që përkon ndoshta edhe me vlerat e demokratëve në SHBA, të laburistëve në Britaninë e Madhe. Po profilizohemi dhe si duket, jemi subjekti i vetëm i qendrës së majtë në Kosovë. Mendoj se kjo do të na ndihmojë tepër shumë në të ardhmen që të artikulojmë më mirë qëndrimet tona. Njerëzit e identifikojnë lëvizjen Vetëvendosje vetëm me protestë, por unë them se lëvizja Vetëvendosje i ka tri gjëra kryesore, e ato janë: kritika, për të cilën jemi të njohur sepse kritikojmë, alternativa, tash që e kemi publikuar, i kemi zgjidhjet tona dhe e treta është aktivizmi që shpesh manifestohet me protesta të cilat i keni parë. Por, tash mendoj se më shumë e më shumë do të identifikohemi si një vizion i qartë politik për të ardhmen e Kosovës.

Zëri i Amerikës: A mund të çojë kjo edhe në ndryshimin e marrëdhënieve të lëvizje Vetëvendosje edhe me diplomacinë euro perëndimore në Kosovë, që nuk kanë njohur gjithmonë ditë më të mira?

Shpend Ahmeti: Ne kemi pasur takime dhe diskutime edhe më herët me ambasadat e ndryshme, përveç me ambasadën e Shteteve të Bashkuara të Amerikës dhe ne i kemi mbajtur, nuk i kemi ndryshuar ato qëndrimet dhe parimet tona. Ne jemi te hapur tepër shumë për diskutime. Por, ne i kemi qëndrimet tona ku i mbrojmë interesat e Kosovës, ata i kanë qëndrimet ku i mbrojnë interesat e shteteve të tyre që përfaqësojnë. Ne jemi për marrëdhënie normale të shtetit tonë, të lëvizjes Vetëvendosje me këto ambasada. Nuk kemi pasur pothuajse kurrë problem me ambasada, gjithmonë kanë ardhë këtu, madje tek ne kanë mbajtur një qëndrim shumë më të barabartë, kisha me e quajt. I thonë qëndrimet e tyre, nuk na tregojnë se kështu duhet të bëni. Dëgjojnë çfarë kemi për të thënë ne dhe mendoj se këto diskutime janë shumë të mira. Unë tash jam kryetar i Prishtinës dhe përfaqësoj të gjithë banorët e Prishtinës. Jo vetëm votuesit e lëvizjes Vetëvendosje, por të gjithë ata që jetojnë këtu edhe të subjekteve tjera dhe në atë kapacitet unë në këto diskutime tash e tutje do të përfaqësoj Prishtinën, gjithmonë me synimin që edhe lëvizja Vetëvendosje përmes meje dhe përmes tjerëve të përmirësojë marrëdhëniet, por duke mbrojtur parimet tona.

Zëri i Amerikës: Si kryetar i Prishtinës, keni filluar punën dhe realisht pritet të ngrisni administratën tuaj. Por, administrata që e trashëgoni a duhet të ketë frikë?

Shpend Ahmeti: Ata që punojnë mirë, që kanë punuar mirë, nuk duhet të kenë frikë. Mirëpo, nëse dikush ka probleme me ligjin, ka gjëra që nuk janë punuar, nuk them se duhet të kenë frikë, por është një proces normal. Ne nuk do të largojmë asnjë njeri nga puna vetëm pse kemi ardhur ne tash dhe themi “ti je nga ky subjekt, apo nga ai subjekt dhe nuk keni vend më këtu”, sepse ajo është e pa arsyeshme dhe nuk është mënyra se si punojmë ne. Por, do te këtë vlerësim të punës, këto janë punët që kërkohen prej juve, do të ketë vlerësim të vazhdueshëm. Po mundohemi të instalojmë një sistem që quhet CMS (Quality management system) i cili ka vlerësim të përhershëm të punës së punëtorëve. Ndërsa, ata që kanë probleme me ligjin, aty nuk ka tolerancë fare. Nëse një prokuror ngrit aktakuzë, ajo bëhet nën dyshimin e bazuar, ne nuk paragjykojmë fajësinë apo pafajësinë, mirëpo, ata persona, sipas ligjeve në fuqi, duhet të suspendohen derisa të përfundohet procesi gjyqësor.
XS
SM
MD
LG