Ministri i jashtëm i Kosovës, Hashim Thaçi, tha të premten në Podgoricë se me reformat kushtetuese, pakica malazeze në Kosovë do të ketë statusin e pakicës kombëtare, që nënkupton të drejtën e përfaqësimit në parlament dhe garanci për të drejta arsimore dhe kulturore.
Ai i bëri këto komente gjatë vizitës në Podgoricë, ku tha se të dyja vendet synojnë integrimet euroatlantike, ndërsa “hyrja e Malit të Zi në NATO është interes strategjik i rajonit dhe këtë ne e mbështesim plotësisht”.
Bashkë me ministrin malazez të punëve të jashtme Igor Lukshiç, janë pajuar se sic thuhet, miqësia ndërmjet Kosovës dhe Malit të Zi “është me e vjetër se shtetet tona” dhe paraqet model për vendet tjera. Ministri Lukshiç tha se marrëdhëniet e mira fqinjësore janë parakusht për integrimet, duke nënvizuar se të dyja vendet kanë mundësi të mëdha për përparimin e marrëdhënieve ekonomike.
Të dy ministrat janë pajtuar që procesi i shënimit të kufirit ndëmrjet dy vendeve të përmbyllet gjatë vitit 2015.
Vizita e ministrit Thaçi po përcillet me masa të rrepta sigurie, për shkak të reagimeve që kishte nxitur tek opozita pro serbe e cila organizoi një protestë në mesditë bashkë me organizatat e serbëve të zhvendosur pas luftës në Kosovë.
Mali i Zi e njohu pavarësinë e Kosovës në tetor të vitit 2008, duke nxitur reagimin e Beogradit i cili dëboi atëbotë ambasadorin malazez në shenjë proteste. Në janar të vitit 2010 të Kosova dhe Mali i Zi vendosën marrëdhënie diplomatike.
Mali i Zi ishte pjesë e shtetit të përbashkët me Serbinë deri në pranverën e vitit 2006 kur shpalli pavarësinë prej saj.