Lidhje

Kurban Bajrami në Tiranë


Dhjetëra mijëra besimtarë muslimanë shqiptarë të të gjitha moshave festuan sot Kurban Bajramin në shëtitoren “Dëshmorët e Kombit”, ndërsa qindra mijëra të tjerë festuan këtë ditë të rëndësishme të besimit të tyre në xhamitë e shumta anembanë vendit.

Udhëheqësit fetarë uruan besimtarët dhe u bënë thirrje për devotshmëri ndaj Zotit, nëpërmjet veprave të bamirësisë dhe mbrojtjes së të dobëtit dhe të varfërit. Kryetari i Komunitetit Musliman Skënder Bruçaj, uroi besimtarët dhe tha se Kurban Bajrami është simbol i sakrificës, devotshmërisë dhe përkushtimit ndaj Allahut, i cili i mëson besimtarët për vëllazëri dhe dashuri mes njerëzve.

Besimtarëve muslimanë ua uroi festën edhe Presidenti Bujar Nishani. Në mesazhin për Kurban Bajramin presidenti Nishani theksoi se kjo festë e madhe i afron njerëzit me njëri-tjetrin, ushqimi ndahet me fqinjin dhe të varfërin, i ngopuri kujton të uriturin, i shëndetshmi ndihmon të sëmurin, i suksesshmi kujton më të dobëtin, dhe të gjithë së bashku kujtojnë Zotin.

Zoti Nishani theksoi se me rastin e vizitës së Papa Françeskut në Shqipëri e gjithë bota pa edhe një herë një nga vlerat kombëtare më të çmuara; tolerancën fetare, respektin reciprok për besimin e tjetrit, paqen mes njerëzve me besim të ndryshëm. Ai ftoi qytetarët që të lënë mënjanë sherret dhe mëritë, duke respektuar dhe ndihmuar njëri-tjetrin.

Shqipëria ka shënuar një histori shumë shekullore të bashkëjetesës dhe harmonisë ndërfetare. Në historinë e këtij populli të lashtë nuk janë shënuar asnjëherë konflikte me natyrë fetare, përkundrazi, shqiptarët kanë jetuar së bashku, duke respektuar besimin e njëri-tjetrit.

Trego komentet

XS
SM
MD
LG