Lidhje

Lëshimi i raketës Falcon 9


Kompania private e teknologjisë së eksplorimit, SpaceX, e konsideron një sukses të madh lëshimin e djeshëm të raketës së saj dhe realizimin e rikthimit në një platformë në det të hapur të pjesës shtytëse të raketës. Kjo arritje konsiderohet si një nxitje e rëndësishme për industrinë e eksplorimit të hapësirës me kosto tashmë të zvogëluara.

Pasi u realizua me sukses lëshimi i raketës Falcon 9, kamerat filmuan se si vetëm pak minuta pas nisjes së raketës me lartësi prej 23-katesh, pjesa e saj e poshtme u shkëput dhe u rikthye drejt platformës së nisjes. Kjo është një arritje thelbësore për kompaninë e zotëruar nga Elon Musk, i cili synon të zhvillojë raketa të ripërdorshme, si një mënyrë për uljen e kostove dhe nxitjen e industrisë së eksplorimit të hapësirës.

Lëshimi i djeshëm ishte misioni i parë i suksesshëm që prej një viti drejt stacionit hapësinor. Qershorin e vitit të kaluar, raketa e kompanisë shpërtheu në flakë për shkak të keqfunksionimit të paisjeve.

“Mendoj se është një arritje e rëndësishme për të ardhmen e fluturimit në hapësirë dhe një tjetër hap drejt yjeve. Për më shumë qasje drejt hapësirës, duhet të realizojmë ripërdorimin e paisjeve. Fakti që e arritëm këtë radhë me shtytësin e raketës, do të ketë një ndikim të madh në uljen e kostove,” u shpreh Elon Musk.

Mjeti hapësinor mbart furnizime dhe paisje për eksperimentet që do të kryhen në Stacionin Ndërkombëtar Hapësinor dhe pritet të mbërrijë atje nesër.

Trego komentet

XS
SM
MD
LG