Lidhje

Lëvizja Vetëvendosje paralajmëron protesta të tjera më 22 janar

  • Leonat Shehu

Lëvizja Vetëvendosje paralajmëron protesta të tjera më 22 janar

Lëvizja Vetëvendosje paralajmëron protesta të tjera më 22 janar

Lëvizja Vetëvendosje paralajmëroi se të dielën e ardhshme më 22 janar do të mbahen protestat e rradhës për bllokimin e mallrave dhe automjeteve të Serbisë. Udhëheqësit e kësaj lëvizjeje thanë se protestat mund të shmangen nëse qeveria nis zbatimin e reciprocitetit të plotë me Serbinë gjatë kësaj jave.

Ky paralajmërim u bë sot në një konferencë me gazetarë një ditë pas dhunës që përshkoi protestat e lëvizjes Vetëvendosje, të cilat u shpërndanë me forcë nga policia. Sipas autoriteteve të rendit, gjate ditës së djeshme janë arrestuar afro 150 persona ndërsa janë plagosur 31 pjesëtarë të policisë dhe dhjetëra protestues gjatë përplasjeve. Në mesin e të arrestuarve ishin edhe pesë deputetë të Parlamentit të Kosovës nga radhët e lëvizjes Vetëvendosje dhe disa nga anëtarët e kryesisë së kësaj partie. Policia tha se aktualisht në arrest po mbahen vetëm 15 veta ndërsa të tjerët janë liruar.

Policia përdori gazin lotsjellës, topat e ujit dhe shkopinjtë e gomës për të shpërndarë protestuesit të cilët hodhën gurë dhe shishe mbi policinë, gjatë ndërhyrjeve që sipas vëzhguesve të Këshillit për Mbrojtjen e të Drejtave dhe Lirive të Njeriut ishte e ngutshme dhe e panevojshme, meqë protestuesit nuk kanë provokuar dhunën apo ndërhyrjen. Ndërkaq policia tha se ka përdorur forcën në pajtim me ligjin dhe rregullat në kundërpërgjigje ndaj veprimeve të protestuesve.

Nënkryetari i lëvizjes Vetëvendosje Shpend Ahmeti tha se kishte strategji për dhunë nga ana e Qeverisë dhe Policisë, por lëvizja është e vendosur të shkojë më tej me planet e saj.

“Me këtë mund të ju them se ne nuk ndalemi në atë që e kemi premtuar. Ne kemi thënë se do të jemi në mbrojtje të vendimit të Kuvendit të Kosovës për reciprocitet të plotë ekonomik, tregtar e politik me Serbinë. Protesta e ardhshme paqësore në bllokim të mallrave dhe automjeteve të Serbisë do të mbahet më 22 janar 2012. Nëse qeveria e Kosovës gjatë kësaj jave nis me zbatimin e reciprocitetit të plotë me Serbinë, natyrisht që nuk do ta mbajmë këtë protestë”, tha zoti Ahmeti.

Me moton Serbia nuk kalon, lëvizja Vetëvendosje kishte planifikuar që të bllokojë dy vendkalimet kufitare me Serbinë, në Merdarë në veri të Prishtinës dhe tek Dheu i Bardhë në lindje të Kosovës, në funksion të siç thuhet zbatimit të masave të ndërsjella politike, ekonomike e tregtare me Serbinë. Udhëheqësit e saj thanë se protesta pasoi refuzimin e qeverisë së Kosovës për të zbatuar vendimin e Parlamentit të Kosovës të 7 dhjetorit të vitit të kaluar për vendosjen e masave të ndërsjella me Serbinë.

Qeveria e Kosovës shprehu siç thuhet, keqardhjen për veprimet e dhunshme të Lëvizjes Vetëvendosje të drejtuara kundër pjesëtarëve të policisë së Kosovës të cilët janë në mbrojtje të rendit dhe ligjit. Ajo kishte kundërshtuar fuqishëm planet e lëvizjes vetëvendosje.

Këto plane janë kundërshtuar edhe nga institucionet tjera vendase e ndërkombëtare të cilat kishin shfaqur shqetësimin për mundësinë e shkallëzimit të situatës dhe pasojat që mund të kenë për imazhin e Kosovës.

Protestat nuk janë mbështetur as nga pjesa tjetër e partive opozitare të cilat kanë kërkuar zgjidhjen e të gjitha çështjeve nëpërmjet institucioneve, por njëkohësisht i kanë bërë thirrje qeverisë që të zbatojë vendimet e Parlamentit të Kosovës.

XS
SM
MD
LG