Lidhje

Maqedoni: Lidhja Social Demokrate autorizon kryetarin Zaev për formimin e qeverisë


Kryetari i Lidhjes Social Demokrate u caktua nga Këshilli qendror i partisë për formimin e qeverisë së re të vendit. Anëtarët e Këshillit e pritën me duartrokitje ardhjen e tij dhe po kështu e miratuan si kandidat për marrjen e mandatit për formimin e qeverisë.

Bashkimi Demokratik për Integrim vendosi mbrëmë t’ja japë nënshkrimet e deputetëve të saj Lidhjes Social Demokrate për të arritur numrin e nevojshëm prej 61 ligjvënësish në mënyrë që presidenti i vendit t’ia dorëzojë mandatin zotit Zaev për formimin e kabetit qeveritar. Para BDI-së, Lëvizja Besa dhe Aleanca për Shqiptarët i kishin ofruar LSDM-së nënshkrimet e deputetëve të tyre. Zoran Zaev do të ketë gjithsej 67 nënshkrime ligjvënsish; për formimin e qeverisë mjafton shumica e thjeshtë prej 61 votash në parlament.

Por, vendimi i BDI-së nuk do të thotë marrëveshje për koalicion qeveritar. Drejtuesit e partisë shqiptare kanë lënë të kuptohet se pasi zoti Zaev të marrë mandatin, do të vazhdojnë bisedimet për kërkesat dhe programet e partive. Ndonëse vendimi i BDI-së i hap rrugën formimit të qeverisë së re, partia nuk e përjashton mundësinë që të mbetet në opozitë.

Nga ana tjetër, VMRO-DPMNE e ish-kryeministrit Nikolla Gruevski nuk pranon të mbetet në opozitë. Gruevski paralajmëron se partia e tij do të marrë masa kundër një qeverie të drejtuar nga LSDM-ja duke thënë se nuk do të mund të ndalonte trazirat që do të pasonin. Partia u ka bërë thirrje për mobilizim degëve nëpër të gjitha qytetet e vendit për të qenë të gatshëm në mbrojtje të vendit.

Një shoqatë e quajtur “Të Palëkundurit”, e formuar këto ditë dhe e njohur për afërsinë me VMRO-në, ka tubuar disa qindra njerëz për t’iu kundërvënë në protesta avancimit të gjuhës shqipe që parashikon marrëveshja në mes LSDM-së dhe BDI-së.

Analistët vlerësojnë se VMRO-ja do të krijojë situata shqetësuese dhe trazira duke e thelluar edhe më shumë krizën dyvjeçare në vend që shpërtheu me bërjen publike të skandalit të përgjimeve të zyrtarëve të lartë qeveritarë dhe politikanëve.

Mendimi juaj

Trego komentet

XS
SM
MD
LG