Lidhje

LSI mbron komisionerin që e mori si maxhorancë


PD thotë se opozita kontrollon gjithë komisionet 4 me 3 dhe 5 me 2, dhe kjo është hera e parë në botë që zgjedhjet nuk organizohen nga qeveria.

Partia Lëvizja Socialiste për Integrim mbrojti dje komisionerin e saj në KQZ, duke e quajtur të paligjshme dhe shkelje flagrante të Kodit Zgjedhor nismën e shumicës për ta zëvendësuar atë, meqë LSI kaloi në opozitë pas 4 vjetësh në koalicionin qeveritar.
Partia, e cila sapo kapërceu nga postet ministrore në radhët e opozitës socialiste, u shkroi një letër ambasadorëve të SHBA, BE dhe OSBE në Tiranë se përpjekjet për të hequr antarin e LSI-së nga KQZ-ja “e kanë bërë situatën jashtëzakonisht kritike dhe mund të minojë legjitimitetin dhe integritetin e gjithë procesit zgjedhor”.

LSI u kërkoi këtyre ambasadorëve “që të angazhohen menjëherë për të parandaluar përshkallëzimin e situatës dhe për të ruajtur standartet e zgjedhjeve të përgjithshme të 23 qershorit”. Letra thekson se ai është një antar i propozuar nga LSI, por ai aty kryen detyra shtetërore dhe sipas nenit 14 të Kodit Zgjedhor mban një mandat 6-vjeçar, ndërsa rastet kur mandati ndërpritet lidhen me pensionin, me dorëheqjen apo me detaje të përgjithshme.

Komisioni parlamentar i ligjeve nisi dje procesin e komisonerit opozitar, ndërsa LSI thotë se sipas ligjit, nismat kundër një antari të saj duhet t’i marrë vetë KQZ-ja dhe e vlerëson këtë si një lëvizje destabilizuese të PD-së, që synon shumicën në administrimin e zgjedhjeve.

Sapo LSI kaloi në opozitë, sipas PD-së komisioneri i propozuar prej saj duhet ndryshuar që të sigurohet balanca e KQZ, sepse mbi barazpeshimin politik është ndërtuar e gjithë administrata zgjedhore”. Me votat e djathta komisioni i ligjeve vendosi lirimin e anëtarit të propozuar nga LSI, e cila deri dje kishte të drejtën e këtij propozimi, si antare e koalicionit qeveritar.

Me kalimin e LSI-së në opozitë raportet u përmbysën. KQZ kontrollohet 4 me 3 nga komisionerët opozitarë, po ashtu edhe gjithë komisionet zonale kontrollohen 4 me 3 dhe disa 5 me 2 nga opozita. Por shumica demokrate beson se lidhja e re PS-LSI po përpiqet në këtë mënyrë të manipulojë procesin zgjedhor, dhe për paradoks, përgjegjësia e mbarëvajtjes së zgjedhjeve i mbetet qeverisë, kur të gjithë votat dhe vulat e zgjedhjeve i ka opozita. Sipas PD-së, ky do të ishte rasti i parë në botë që zgjedhjet i organizon opozita, se kjo paligjshmëri e sjellë nga LSI shkatërron përgatitjen e zgjedhjeve, votimin, numërimin dhe shpalljen e rezultateve. Prishja e kësaj barazpeshe - shton më tej PD - përmbys sistemit ligjor të menaxhimit të zgjedhjeve dhe paralajmëron manipulimin nga opozita” - i shkroi PD parlamentit.

Debatet në komisionin parlamentar të ligjeve ishin mjaft të ashpra. Socialistët folën për një veprim antiligjor dhe goditje të rëndë për standardet demokratike. Shumica foli për nevojën e balancimit të komisioneve zgjedhore dhe miratoi dy kandidatura të propozuara nga PR, të cilat pritet të votohen sot në seancën plenare të parlamentit.

Mendimi juaj

Trego komentet

XS
SM
MD
LG