Lidhje

Të hënën debati i parë televiziv Trump - Clinton


Kandidatja demokrate për presidente, Hillary Clinton, dhe kandidati republikan Donald Trump përballen nesër në debatin e parë televiziv që do të transmetohet nga Nju Jorku. Mendohet se shikueshmëria do të jetë më e larta e fushatës së deritanishme presidenciale dhe mund të ndikojë në rezultatin e një gare të ngushtë drejt Shtëpisë së Bardhë.

Debati i parë do të jetë një moment kyç për republikanin Donald Trump, i cili gjatë këtyre javëve ka ngushtuar diferencën me demokraten Hillary Clinton.

“Do ta bëjmë sërish madhështore Amerikën. Do ta bëjmë sërish të sigurtë dhe madhështore! Faleminderit dhe Zoti qoftë me ju,”- tha Trump.

Zonja Clinton synon të qetësojë mbështetësit e saj dhe të promovojë mesazhin e saj për ngritjen e një ekonomie më gjithëpërfshirëse:

“Të gjithë kemi vlerë. Në Shtetet e Bashkuara, vendin më të mirë në botë, ne besojmë se të gjithë lindin të barabartë!” - tha ajo.

Debatet mund të ndryshojnë gjithçka, thotë analisti Matthew Dallek:

“Tashmë sondazhet janë me rezultat shumë më të ngushtë se sa mendohej, kështu që debati do të jetë me rëndësi.”

Debatet televizive filluan në vitin 1960 ndërmjet Richard Nixon-it dhe John Kennedy-it, dhe me kalimin e kohës kanë fituar më shumë peshë.

“Në një vit normal, debatet janë ndër mënyrat e vetme për të ndryshuar rezultatin. Është momenti që ndiqet nga më shumë njerëz.”

Të dy kandidatët dolën mirë gjatë debateve të zgjedhjeve paraprake.

Por, natyra e paparashikueshme e zotit Trump përbën një sfidë për zonjën Clinton.

“Donald Trump nuk është aq i disiplinuar sa Hillary Clinton. Nëse e prek diku, ai ka tendencën të reagojë në mënyrë shumë personale,”- thotë analisti.

Të dy kandidatët vuajnë nga një nivel i lartë mospëlqimi nga votuesit, dhe debati u ofron mundësi, por edhe rreziqe.

“Debati i ofron kandidatit mundësinë të krijojë një përshtypje ndryshe, ose të çimentojë një perceptim negativ.”

Do të ketë gjithsej tre debate presidenciale dhe një përballje ndërmjet kandidatëve për nënpresident, demokratit Tim Kaine dhe republikanit Mike Pence.

Trego komentet

XS
SM
MD
LG