Parlamenti i Malit të Zi, ndërpreu punimet e së premtes, për shkak të incidenteve të shkaktuara nga opozita.
Incidentet shpërthyen në momentin kur kryeministri Milo Gjukanoviç, doli në foltore për të propozuar emrat e disa ministrave të rinj të qeverisë malazeze.
Deputetët opozitarë të grupimit proserb, ”Fronti Demokratik” brohoritën duke fyer kryeministrin Gjukanoviç dhe duke ju vërsulur atij.
Gjendja nuk u qetësua as pas ndërhyrjes së kryetarit të parlamentit, Ranko Krivokapiç dhe ndërprerjes së transmetimit të punimeve të parlamentit.
Kryeministri Gjykanoviç pas kësaj braktisi parlamentin i cili sot duhej të debatonte zbatimin e marrëveshjes politike mes pushtetit dhe opozitës për ngritjen e një qeverie të "besimit zgjedhor".
Marrëveshja parashikon që katër ministri dhe posti i nënkryetarit të qeverisë t'i ndahet opozitës deri në zgjedhjet e ardhshme parlamentare që pritet të mbahen në fund të këtij viti. Kjo marrëveshje do të ndihmonte në përgatitjen e zgjedhjeve të lira dhe të drejta në Mal të Zi.
Incidenti i sotëm në parlament mund të ndikojë negativisht tek marrëveshja mbi bashkëqeverisjen e pozitës dhe opozitës në Mal të Zi.