Në Mal të Zi po mbahen bisedimet midis kryeministrit Milo Gjukanovic dhe partive opozitare në kuadër të dialogut parlamentar për gjetjen e modelit të besueshëm zgjedhor dhe përgatitjeve për zgjedhjet e parakohëshme. Bisedimet pritet të vazhdojnë nesër dhe deri në fund të javës që vjen pritet një marrëveshje përfundimtare ku opozita për herë të parë mund të jetë pjesë e qeverisjes në Mal të Zi. Dialogu parlamentar midis opozitës dhe partive në pushtet nisi pas marrjes së votëbesimit për Qeverinë e kryeministrit Gjukanovic në fund të muajit të kaluar ku e mbështeti edhe një pjesë e opozitës me kusht që të ngritet një plan për tejkalimin e krizës politike në Mal të Zi.