Një grup të rinjsh vullnetarë kanë ngritur në qytetin e Fushë Arrësit një qendër sociale në mbështetje të moshës së tretë. Në qytetet e vogla, në Veri të Shqipërisë, pjesa më e madhe e banorëve përballen jo vetëm me nivelin e lartë të varfërisë, por edhe me mungesën e theksuar të përkujdesjes ndaj moshës së tretë. Banorët që tashmë i përkasin kësaj moshe, kanë punuar gjatë gjithë jetës së tyre në fronte të vështira, siç janë minierat dhe shfrytëzimi i pyjeve, gjë që tani e bën më shumë të nevojshëm përkujdesjen ndaj tyre.